पेरिस, असोज १ : पेरिसस्थित एक ‘नेचुरल हिस्ट्री म्युजियम’बाट छ लाख युरो (सात लाख अमेरिकी डलर) मूल्य बराबरको सुनका वस्तु चोरी भएका सङ्ग्रहालयले बुधबार जानकारी गराएको छ । डायनासोरको कङ्काल र ट्याक्सिडर्मीको लागि प्रसिद्ध, फ्रान्सको राजधानी पेरिसको सुन्दर पाँचाैँ जिल्लामा रहेको राष्ट्रिय प्राकृतिक इतिहास सङ्ग्रहालयमा भूविज्ञान र खनिज ग्यालरी पनि रहेका छन् ।
पेरिसवासी र पर्यटकबिचमा लोकप्रिय सङ्ग्रहालय स्थलमा चोरी भएको मङ्गलबार बिहान पत्ता लागेको हो । चोरले ‘एङ्गल ग्राइन्डर’ र ‘ब्लो टर्च’को प्रयोग गरेर नदी किनारमा अवस्थित सङ्ग्रहालय स्थलमा प्रवेश गरेका थिए । सङ्ग्रहालयको प्रेस कार्यालयले मङ्गलबार अबेर एएफपीलाई दिएको जानकारीमा भनिएको छ, “सङ्ग्रहालयले राखेको राष्ट्रिय सङ्कलनबाट धेरै नमूना चोरी भएको हो ।”
सङ्ग्रहालय स्रोतले भनेको छ, “चोरी गरिएका नमूना कच्चा सुनको मूल्यको आधारमा लगभग छ लाख यूरो मूल्य हो । यद्यपि, वस्तुको ऐतिहासिक तथा कलात्मकताका कारण तिनीहरू यो भन्दा बढी मूल्यवान् थिए ।” चोरी भएका वस्तुमा प्रयोग भएको सुन मिश्र धातु हो जुन उनीहरूको प्राकृतिक रूपमा सुन र चाँदीको मिश्रण रहेको थियो ।
प्रहरी स्रोतले पेरिसको एक पत्रिकालाई दिएको जानकारीमा सङ्ग्रहालयको सुरक्षार्थ सेन्सर जडित घन्टी र सुरक्षा सम्बन्धी प्रणाली जुलाईमा भएको साइबर आक्रमणबाट चल्न छोडेको थियो । “हामीलाई जानकारी भएसम्म चोरीमा एक अत्यन्त पेशेवर टोली संलग्न रहेको थियो । उनीहरूलाई चोरी गर्दा कहाँ जाने र व्यावसायिक उपकरणको कसरी प्रयोग गर्ने पूर्णरूपमा जानकारी भएको हुनुपर्छ,” सङ्ग्रहालयका निर्देशक इमानुएल स्कोलियोसले बिएफएम टिभी च्यानलसँग भन्नुभयो । “यो बिल्कुल संयोग थिएन, तिनीहरू यी विशिष्ट वस्तुहरूका लागि नै गएका थिए,” उहाँले थप्नुभयो ।
-सङ्कटको अवस्था-
चोरीपछि सङ्ग्रहालयले मङ्गलबार आफ्नो खनिज ग्यालरी बन्द गरी अन्य क्षतिका लागि यसको सङ्ग्रह जाँच गरेको छ । यसको एउटा खजाना ८.५ सेन्टिमिटर (३.३–३.५ इन्च) मापन गरिएको छ र एक धनी फ्रान्सेली सङ्ग्रहकर्ताले सङ्ग्रहालयलाई उपहार दिएका थिए ।
“विशेष गरी सांस्कृतिक संस्था र सङ्ग्रहालयमा हालैका महिनामा धेरै सार्वजनिक सङ्ग्रह चोरीको निशानामा परेका छन्,” सङ्ग्रहालयले थप्यो । अन्य डकैतीको बारेमा विस्तृत विवरण दिइएको छैन । मध्य फ्रान्सको लिमोजेसमा रहेको एड्रियन डुबोचे राष्ट्रिय सङ्ग्रहालयमा यस महिनाको सुरुमा चोरी भएको थियो ।
“यसअघि, चोरले राष्ट्रिय सम्पत्तिको रूपमा वर्गीकृत चिनियाँ पोर्सिलेनमा दुई व्यञ्जन र फूलदान चोरेका थिए, जसमा ६.५ मिलियन युरो क्षति भएको अनुमान गरिएको थियो ।” केही दशक यता भएका केही कुख्यात सङ्ग्रहालय डकैतीमध्ये पेरिसको ‘मुसी डी आर्ट मोडर्न’ सन् २०१० मेमा भएको चोरी थियो ।
