एनपीएल ट्रफीसहित ‘लुम्बिनी लायन्स’ तानेसनमा

पाल्पा, पुस १४ : एनपीएल ट्रफीसहित तानसेन आएको लुम्बिनी लायन्सको टोलीलाई भव्य स्वागत गरिएको छ । तानसेन नगरपालिका, जिल्ला क्रिकेट संघ, खेलाडी, होटल व्यवसायी लगायतले लुम्बिनी लायन्सलाई स्वागत गरेका हुन् ।

आइतबार बेलुकी गुल्मीका विभिन्न स्थान हुँदै रिडी भएर तानसेन आइपुगेको टोलीलाई बेलुकी नै होटल पौवामा खेलाडी तथा होटल सञ्चालकले भव्य स्वागत गरे । सोमबार बिहान ऐतिहासिक तथा धार्मिक रणउजीरेश्वरी भगवती मन्दिरमा प्रदर्शन गरिएको छ । मन्दिरमा खेलाडीका साथै सर्वसाधारण, विद्यार्थीले स्वागत गर्दै ट्रफीसँगै फोटो खिचाए ।

जिल्ला समन्वय समितिका प्रमुख टंकनाथ खनाल, उपप्रमुख काशिका ज्ञवाली गैरे लगायतले बधाई दिँदै आगामी वर्ष पनि पुनः खेल जित्न शुभकामना दिए । पाल्पा दरबार परिसरमा पनि ट्रफी हेर्न, फोटो खिच्न भीड लागेको थियो । पाल्पा दरबार संग्रहालय परिसरमा सर्वसाधारणहरु ट्रफी हेर्न पुगेका हुन् । ट्रफी प्रदर्शन कार्यक्रममा लुम्बिनी प्रदेशबाट प्रतिनिधित्व गर्ने लुम्बिनी लायन्सका टोलीलाई जिल्ला क्रिकेट संघ, तानसेन नगरपालिका लगायतबाट सम्मान गरिएको छ ।

तानसेनका नगरप्रमुख सन्तोषलाल श्रेष्ठले हरेक नागरिकको क्रिकेट खेलप्रति आकर्षण र खेलाडीको सम्मानका लागि ट्रफी प्रदर्शनले हौसला बढाएको बताए । उनले समग्र खेलकुदको विकासलाई तानसेन नगरपालिकाले सहयोग गर्दै आएको समेत जानकारी गराए ।

लुम्बिनी प्रदेशका विभिन्न जिल्ला सदरमुकामसाथै ग्रामीण बस्तीमा समेत ‘सेलिब्रेसन‘ गर्दै पाल्पा आएका हुन् । लुम्बिनी लायन्सको यो ट्रफी सेलिब्रेसनले किक्रेट क्रेजलाई थप वृद्धि गरेको अनुभव क्रिकेटका अगुवा तथा जिल्ला क्रिकेट संघका कार्यवाहक अध्यक्ष शैलेन्द्र भट्टराईले बताए ।

सबै जिल्लामा स्थानीय बासिन्दा, खेलाडी, नागरिक समाज, जनप्रतिनिधि लगायत सबैको माया पाउादा निकै उत्साहितसमेत बनाएको सेलिब्रेसन टुरमा सहभागीले बताएका छन् । बाँके, बर्दिया, दाङ, रोल्पा, रुकुमपश्चिम, प्यूठान, अर्घाखाँची, गुल्मी हुँदै पाल्पा आएको लुम्बिनी लायन्सले तानसेन, बर्तुङ, सिद्धबाबा, बुटवल हुँदै पश्चिम नवलपरासी र रुपन्देहीको मायादेवी लुम्बिनीको यात्रा तय गर्ने फ्रेन्चाइज म्यानेजर गौरव फुँयालले बताए ।

– माधव अर्याल