सुन जस्तै धातु देखाई पाँच लाख ठगी गर्ने चारजना पक्राउ

काठमाडौँ, पुस ८ गते । सुन जस्तै देखिने धातुको डल्लो देखाई ठगी गरेको अभियोगमा चार जनालाई प्रहरीले पक्राउ गरेको छ। कागेश्वरी मनोहरा नगरपालिका–५ थली क्षेत्रमा ठगी गरी फरार रहेका व्यक्तिहरूको खोज तलासका क्रममा उनीहरू पक्राउ परेका हुन्।

प्रहरीका अनुसार मिति २०८२ पुस ८ गते काठमाडौँ जिल्ला अन्तर्गत कागेश्वरी मनोहरा नगरपालिका–५ थलीमा सुनजस्तो देखिने धातुको डल्लो दिएर दुईजनाको समूहबाट नगद पाँच लाख रुपियाँ ठगी गरी फरार भएका व्यक्तिहरूको खोजी भइरहेको थियो। सोही क्रममा प्रहरी वृत्त बौद्धबाट खटिएको प्रहरी टोलीले काठमाडौँ महानगरपालिका–६ चुच्चेपाटी क्षेत्रबाट चार जनालाई पक्राउ गरेको जनाएको छ।

पक्राउ पर्नेमा मकवानपुर जिल्ला इन्द्रसरोवर गाउँपालिका–३ घर भई हाल ललितपुर महानगरपालिका–१३ नख्खु बस्दै आएका ४५ वर्षीय सुकुमान सिंह ब्लोन, मकवानपुरकै इन्द्रसरोवर गाउँपालिका–२ घर भई हाल ललितपुर महानगरपालिका–८ पाटन बस्ने ४८ वर्षीय राजेन्द्र तामाङ रहेका छन्।

त्यसैगरी मकवानपुर जिल्ला बकैया गाउँपालिका–११ घर भई हाल ललितपुर महानगरपालिका लगनखेल बस्ने ५३ वर्षीय बिरबहादुर तामाङ  भन्ने बिवासित स्याङ्तान  र नवलपरासी जिल्ला देवचुली नगरपालिका–१७ घर भई हाल ललितपुर एकान्तकुना बस्ने ४२ वर्षीय जित बहादुर तामाङ  पनि पक्राउ परेका छन्।

पक्राउ परेका चारै जनाविरुद्ध ठगी कसुरमा अनुसन्धान अघि बढाइएको प्रहरीले जनाएको छ। उनीहरूलाई आवश्यक म्याद थप गरी थप अनुसन्धान कार्य भइरहेको प्रहरी वृत्त बौद्धले जानकारी दिएको छ।