काठमाडौँ, ९ मङ्सिरः इंग्लिस प्रिमियर लिग अन्तर्गत शनिबार राति भएको खेलमा टोटनहामले म्यानचेस्टर सिटीलाइ ४-० को अन्तरले उसैको मैदानमा हराएको छ | टोटनहामको जितमा जेम्स म्याडिसनले दुई गोल गरे भने पेड्रो पोरो र ब्रेनान जोनसोनले एक-एक गोल गरे । दुवै हाफमा दुई-दुई गोल भए । गएराति नै भएका अन्य खेलहरूमा आर्सनल र चेल्सीले पनि जित निकालेका छन् । आर्सनलले नोटिङहाम फरेस्टलाई ३-० ले हराउँदा चेल्सीले लेस्टर सिटीलाई २-१ ले हरायो ।
आर्सनलको जितमा बुकायो साका, थोमस पार्टे र इथान न्वानेरीले १-१ गोलको योगदान गरे । जितसँगै आर्सनल १२ खेलमा २२ अंकसहित चौथो स्थानमा उक्लिएको छ । नोटिङहाम १९ अंकसहित सातौं स्थानमा छ ।
त्यस्तै चेल्सीको जितमा निकोलस ज्याकसन र एन्जो फर्नान्डेजले एक-एक गोल गरे । लेस्टरका जोर्डन आयूले पेनाल्टीमार्फत गोल फर्काएपनि हार टार्न पर्याप्त रहेन ।
जितपछि चेल्सी १२ खेलमा २२ अंकसहित तेस्रो स्थानमा छ भने १० अंक मात्र जोडेको लेस्टर १६औं स्थानमा छ ।
