काठमाडौँ, ७ पुस : युवा तथा खेलकुदमन्त्री तेजुलाल चौधरीले दोस्रो नेपाल प्रिमियर लिग (एनपिएल) अहिलेको भन्दा थप व्यवस्थित र उत्कृष्ट बनाइने बताउनुभएको छ । यसका लागि सरकारका तर्फबाट लागिपर्ने उहाँले प्रतिबद्धता व्यक्त गर्नुभयो ।
रिपोर्टर्स क्लबले आज यहाँ आयोजना गरेको अन्तरक्रियामा मन्त्री चौधरीले कीर्तिपुर क्रिकेट रङ्गशाला निर्माणका लागि बोलपत्र आह्वान भइसकेको जानकारी दिनुभयो । रङ्गशाला अत्याधुनिक बनाउन स्रोत सुनिश्चित भएको उहाँले बताउनुभयो । खेल क्षेत्रको विकासका लागि सबैभन्दा ठूलो चुनौती भौतिक पूर्वाधार रहेको उल्लेख गर्दै मन्त्री चौधरीले आफ्नो मन्त्रालयको कुल बजेट रु तीन अर्ब ५० करोड रहेकाले खेलकुद र खेलाडीको वृत्तिविकासका लागि अपेक्षाकृत काम गर्न नसकिएको बताउनुभयो ।
मन्त्री चौधरीले मूलपानी, विराटनगर क्रिकेट रङ्गशाला र कीर्तिपुर रङ्गशालामा गरी कुल रु १२ अर्बभन्दा बढीको लागत लाग्ने जानकारी दिनुभयो । सातै प्रदेशमा तत्काल क्रिकेट रङ्गशालाको खाँचो औँल्याउँदै उहाँले भन्नुभयो, “क्रिकेटका तीनवटा रङ्गशाला राष्ट्रिय गौरवको योजनामा छन् । तीनवटै रङ्गशालाको बजेट करिब रु १२ अर्ब पेस भएको छ ।”
सरकारले खेलाडीको वृत्तिविकास, मनोबल उच्च बनाउन र खेलाडीको आर्थिक अवस्था बलियो बनाउन नीतिगत निर्णय गर्ने मन्त्री चौधरीको भनाइ थियो । बैङ्कर्स सङ्घ, आयल निगम, विद्युत् प्राधिकरणलगायत संस्थाहरुसँग खेलाडीको वृत्तिविकास र रोजगारीका लागि छलफल भइरहेको उहाँले जानकारी दिनुभयो ।
खेलकुद क्षेत्रको विकासका लागि भौतिक पूर्वाधार निर्माणको आवश्यकता रहेको बताउँदै मन्त्री चौधरीले काठमाडौँ उपत्यकाभित्रै फुटबलका लागि नयाँ रङ्गशाला निर्माण गर्न उपयुक्त स्थानको खोजी भइरहेको बताउनुभयो ।
