नेपालद्वारा इटालीलाई १२४ रनको मध्यम लक्ष्य

काठमाडौँ, माघ २९ गते ।आइसिसी टी–२० विश्वकपअन्तर्गत समूह चरणको दोस्रो खेलमा जितका लागि नेपालले इटालीलाई एक सय २४ रनको मध्यम लक्ष्य दिएको छ ।

मुम्बईस्थित वनखेडे मैदानमा बिहीबार टस हारेर पहिले ब्याटिङको निम्तो पाएको नेपालले १९.३ ओभरमा सबै विकेटको क्षतिमा एक सय २३ रन बनायो ।

नेपालका लागि आरिफ शेखले सर्वाधिक २७ रन बनाउनुभयो । उहाँले २४ बलमा तीन चौकाको सहयोगमा उक्त रन जोड्नुभएको हो । यस्तै कप्तान रोहित पौडेलले २३ रन बनाउनुभयो । उहाँले १४ बलमा दुई छक्काको सहयोगमा उक्त रन बनाउनुभएको हो ।

ओपनर आशिफ शेखले २० रन जोड्टा अर्का ओपनर कुशल भुर्तेल पाँच रनमा आउट हुनुभयो । यस्तै दीपेन्द्रसिंह ऐरीले १७ रन बनाउनुभयो । लोकेश बम र गुल्शन झा तीन तीन रन जोड्दै पेभेलियन फर्किनुभयो ।

त्यसपछि करण केसीले अविजित १८ रन बनाउनुभयो । सन्दीप लामिछाने पाँच रन तथा नन्दन यादव र ललित राजवंशी शुन्य रनमा रन आउट हुनुभयो ।

बलिङमा इटालीका क्रिशन कालुगामेजले तीन विकेट लिनुभयो । बेन मनेन्टीले दुई तथा अलि हसन, जेजे स्मुथ र जसप्रित सिंहले एक एक विकेट लिनुभयो ।

पहिलो खेलमा टेस्ट टोली इङ्ल्यान्डसँग सनसनीपूर्ण प्रदर्शन गर्दै  चार रनले पराजित भएको नेपालमाथि आजको खेल जित्नैपर्ने दबाब छ । पहिलो पटक विश्वकप खेलिरहेको इटाली पनि नेपाललाई हराएर सुपर आठको यात्रा तयगर्ने दाउमा छ ।

टी–२० अन्तर्राष्ट्रियमा नेपाल र इटालीबिच पहिलो पटक भिडन्त भएको हो । नेपाल र इटालीबिच १३ वर्ष अगाडि एक दिवसीय खेलमा भने प्रतिस्पर्धा भएको थियो । आइसिसी वर्ल्ड क्रिकेट लिग डिभिजन–३ को उक्त खेलमा नेपालले इटालीलाई आठ विकेटले हराएको थियो ।

नेपालसहित इङ्ल्यान्ड, वेस्ट इन्डिज, स्कटल्यान्ड र इटाली रहेको समूह ‘सी’ मा हाल वेस्ट इन्डिजले लगातार दुई खेल जित्दै चार अङ्क बनाएको छ ।

इङ्ल्यान्ड र स्कटल्यान्डको दुई दुई अङ्क छ । अङ्कबिहीन नेपाल र इटाली पहिलो जित निकाल्ने अभियानमा छन् । इटालीपछि नेपालले फागुन ३ गते वेस्ट इन्डिज र फागुन ५ गते स्कटल्यान्डसँग खेल्ने छ । नेपालले समूह चरणका सबै खेल मुम्बईस्थित वनखेडे स्टेडियममै खेल्ने छ ।

नेपालले समग्रमा तेस्रो र लगातार दोस्रो पटक टी–२० विश्वकप खेलेको हो । यसअघि नेपालले सन् २०१४ र सन् २०२४ को अघिल्लो संस्करण खेलेको थियो ।