मधेस जाँदैछु, किनकि म देश जोड्न चाहन्छु : कांग्रेस सभापति थापा

काठमाडौँ, माघ १२ : कांग्रेस सभापति गगन थापाले देशलाई जोड्न मधेस जान लागेको बताएका छन् । काठमाडौं-४ का मतदातालाई सम्बोधन गर्दै थापाले सोमबार एक भिडियो सन्देश जारी गर्दै आफू देशलाई जोड्न मधेस जान लागेको बताएका हुन् ।

देशको एक ठाउँको अवस्था अर्को ठाउँमा सुनाउनुपर्ने सभापति थापाको भनाइ छ । ‘म मधेस जाँदैछु किनकि म देश जोड्न चाहन्छु । म काठमाडौंका कथाहरू मधेस लगेर सुनाउन चाहन्छु । अनि मधेसका कथाहरू, मधेसका पीडाहरू, मधेसका व्यथाहरूलाई बुझ्दै काठमाडौं ल्याएर सुनाउन पनि चाहन्छु । म सबैको सम्मान रहँदै गर्दा मात्रै हामीसँगै नेपालीहरूको सम्मान रहन्छ भन्ने कुरामा विश्वास राख्छु,’  सभापति थापाले भने, ‘म उत्तेजनाको राजनीतिमा विश्वास राख्दिनँ तर म अधिकार नभइकन सबैको बीचमा एकता हुन्छ भन्ने कुरामा विश्वास राख्दिनँ ।‘

२०७० को संविधानसभा निर्वाचन, २०७४ र २०७९ को प्रतिनिधिसभा निर्वाचनमा काठमाडौं-४ बाट निर्वाचित भएका सभापति थापा आगामी फागुन २१ को निर्वाचनमा सर्लाही-४ बाट उम्मेदवार बनेका छन् । काडमाडौं-४ का मतदाताले यसपटक निर्वाचन क्षेत्र नछोड्न भनेर आग्रह गरेको अवस्थामा पनि मधेससँगको सम्बन्ध बिस्तार गर्न आफू सर्लाही जान लागेको थापाको भनाइ छ ।

‘म भर्खर मात्र विशेष महाधिवेशनबाट पार्टीको सभापति भएको छु । यो पटक पार्टीका साथीहरूले कुनै पनि हालतमा निर्वाचन क्षेत्र छोड्नु हुँदैन भनेर भन्नुभयो । तर मलाई कांग्रेस पार्टीको एउटा जिम्मेवारी निर्वाह गरिरहँदै गर्दा मधेशसँगको सम्बन्धलाई अझै प्रगाढ बनाउनु पर्छ भन्ने मेरो तीव्र इच्छा रह्यो,’ सभापति थापाले भने, ‘सर्लाही क्षेत्र नम्बर ४ का साथीहरूले माया गरेर बोलाउनुभयो । म त्यहाँ जाँदैछु । मधेसको प्रतिनिधित्व गर्दै गर्दा र त्यहाँका मुद्दाहरूलाई बुझ्दै गर्दा, त्यसको समाधानको लागि मैले पहल गर्दै गर्दा प्रकारान्तरले मैले सिंगो नेपालको मुद्दाहरूलाई नै हल गर्ने कुरामा ठूलो आफ्नो भूमिका निर्वाह गर्नसक्छु भन्ने विश्वास राखेको छु ।‘

सभापति थापाले मधेससँग जोडिनका लागि काठमाडौंबाट सर्लाही जाने निर्णयमा पुगेको सभापति थापाको भनाइ छ । काठमाडौं-४ मा कांग्रेसले सचिन तिमिल्सिनालाई उम्मेदवार बनाएको छ ।

माघ ६ मा वारेस मार्फत मनोनयन दर्ता गरेका सभापति थापा सोमबार सर्लाही-४ पुगेका छन् ।