निर्वाचनका सन्दर्भमा एकपक्षीय प्रचारप्रसार नगर्न प्रेस काउन्सिलको आग्रह

काठमाडौँ, माघ ६ गते । प्रेस काउन्सिल नेपालले निर्वाचनका सन्दर्भमा कुनै दल विशेष वा उम्मेदवारलाई मत आह्वान गर्ने, एकपक्षीय प्रचारप्रसारलाई प्रश्रय दिँदै प्रचारप्रसार नगर्न आग्रह गरेको छ ।

प्रेस काउन्सिल नेपालका सहप्रशासकीय अधिकृत एवम् सहप्रवक्ता रामशरण बोहराले बुधबार विज्ञप्ति जारी गर्दै पत्रकारिताका मूल्य, मान्यता विपरीत गैरपेसागत आचरण गर्ने, तथ्यगत परीक्षण एवम् आधार÷प्रमाण बेगर सामग्री सम्प्रेषण गर्ने, सामाजिक सञ्जालको दुरुपयोग गरी समाजमा उत्तेजना फैलाउने कार्य गैरकानुनी भएको बताउनुभएको छ ।

निर्वाचनको सन्दर्भमा परिस्थितिलाई उत्तेजक बनाउन नियोजित रुपमा गलत, मिथ्या एवम् तथ्यलाई तोड-मरोड गरी सामग्री प्रकाशन गर्ने, पेसागत आचरण विपरीत एवम् गैरकानुनी भएको उहाँको भनाइ छ ।

उहाँका अनुसार आर्थिक वर्ष २०८२/८३ को पुस मसान्तसम्म १६३ वटा उजुरी दर्ता भएको थियो । जसमध्ये पत्रकार आचारसंहिताको प्रक्रिया बमोजिम पत्राचार भएपश्चात् ७७ वटा खण्डन सम्प्रेषण भएको, ५२ वटा पेस भएको जवाफ उजुरीकर्तालाई जानकारी गराइएको, १४ वटा क्षमायाचना भएका, पाँच वटाले सामग्री स्थगन गरेका, दश वटालाई स्पष्टीकरण सोधिएको र पाँच वटालाई निर्देशन एवम् सचेत गराइएको छ ।

२०८२ माघ ११ गते राष्ट्रियसभा सदस्य निर्वाचन र २०८२ फागुन २१ गते प्रतिनिधिसभा सदस्य निर्वाचन हुन गइरहेको सन्दर्भमा माघ ४ गते राति १२ बजेदेखि निर्वाचन आचारसंहिता, २०८२ लागु भएको अवस्थामा पत्रकार तथा सञ्चार माध्यमबाट पत्रकार आचारसंहिता पालना भए, नभएको विषयमा नियमित अनुगमन भइरहेको पनि प्रेस काउन्सिलले जनाएको छ ।