सेयर बजार १.५२ अंक बढे, नेप्से २६४१ अंकमा, ६ अर्ब २० करोडको कारोबार

३० पुस, काठमाडौं । पुसको अन्तिम दिन बुधबार सेयर बजार  १.५२ अंक बढेको छ । सो वृद्धिपछि नेप्से  परिसूचक २६४१ अंकमा कायम भएको छ । दिनभर बजारको उतारचढाव सामान्य रह्यो । कारोबार रकम सामान्य घटेको छ । अघिल्लो दिन ६ अर्ब ९९ करोडको कारोबार भएकोमा आज ६ अर्ब २० करोडको भयो ।

१२५ कम्पनीको मूल्य बढ्दा १२४ को घट्यो भने ११ को स्थिर रह्यो । यस दिन फाइनान्स समूहका कम्पनीमा लगानीकर्ताको आकर्षण देखिएको छ । सो समूह सबैभन्दा धेरै २.५५ प्रतिशत बढ्यो । मूल्य धेरै बढेका कम्पनीमा पनि फाइनान्सकै वर्चस्व रह्यो । त्यस्तै विकास बैंक ०.०१, होटल तथा पर्यटन ०.३१, हाइड्रोपावर ०.०७, लगानी ०.११, निर्जीवन बीमा ०.३८, व्यापार ०.६७ प्रतिशत बढे । बैंकिङ०.०८, जीवन बीमा ०.०१, उत्पादन तथा प्रशोधन ०.४१ तथा माइक्रोफाइनान्स ०.०५ तथा अन्य ०.१३ प्रतिशत घटे ।

सुपर मादी हाइड्रोपावरको मूल्य सबैभन्दा धेरै ९.९४ प्रतिशत बढ्यो । थ्रीस्टार हाइड्रोपावरको ८.२३, एनएमबी माइक्रो फाइनान्सको ७.३४, गुडविल फाइनान्सको ५.७३, मल्टिपर्पस फाइनान्सको ४.८१, मञ्जुश्री फाइनान्सको ४.१७ प्रतिशत मूल्य बढ्यो । मकर जितुमाया सुरीको मूल्य २.५ प्रतिशत घट्यो । आज धेरै कारोबार भएका कम्पनीमा राधि विद्युत्, युनियन हाइड्रोपावर, एसवाई प्यानल, मञ्जुश्री फाइनान्स तथा दोर्दीखोला जलविद्युत् रहे ।