१५ भदौ, काठमाडौं : चक्रपथ दोस्रो खण्डको अन्तिम (फाइनल) डिजाइन एक महिनाभित्र आउने भएको छ । त्यसका लागि चीनमा डिजाइन फाइनल गर्ने काम भइरहेको सडक विभागले जनाएको छ । ७ वर्षभन्दा बढी समयदेखि चीन सरकारले विस्तारको काम गर्ने भनेर चर्चा पाएको चक्रपथ दोस्रो खण्डको फाइनल डिजाइन आउनसाथ ठेक्का प्रक्रिया अघि बढाइनेछ ।
एक महिनाभित्र चिनियाँ प्राविधिक टोलीले फाइनल डिजाइन पठाउने जानकारी आएको काठमाडौं चक्रपथ सडक विस्तार आयोजना कार्यालयका प्रमुख कृष्णनाथ ओझाले बताए । ‘गत असार दोस्रो साता चिनियाँ प्राविधिक टोली सर्भेको काम सकेर फर्कियो,’ उनले भने, ‘अब एक महिनाभित्र उताबाट फाइनल डिजाइन आउनेछ ।’ डिजाइन आएपछि सडक विभागले हेरेर पुनः उतै पठाउने उनको भनाइ छ ।
‘डिजाइन हेरेर पठाउन धेरै समय लाग्दैन, बढीमा एक सातामा पठाइसक्छौं,’ उनले भने, ‘त्यसपछि चीन सरकारले उतै ठेक्का आह्वान गर्नेछ, निर्माण कम्पनी पनि उतै छनोट गरेपछि टोलीले आएर काम थाल्नेछ ।’ बढीमा अबको साढे दुई महिनाभित्र ठेक्का भएर काम सुरु हुने उनको भनाइ छ । गत ६ वैशाखमा चिनियाँ सरकारी कम्पनी सीसीसीसी फस्ट हाइवे कन्सल्टेन्ट्स र सिआन फाङ्झाउ इन्जिनियरिङ कन्सल्टिङका १८ जना प्राविधिक सर्भे गर्न नेपाल आएका थिए । प्राविधिक टोलीले साढे दुई महिना लगाएर सर्भेको काम सकेको थियो ।
चीन सरकारको अनुदानमा कलंकीदेखि वसुन्धरा कल्भर्टसम्मको ८.२ किलोमिटरमा विस्तारको काम गर्न लागिएको हो । वनस्थली नजिकको ढुंगेधारामा कल्भर्टको ठाउँमा पुल बनाउन प्रस्ताव गरिएको प्रमुख ओझाले बताए । ‘ढुंगेधारामा पुल निर्माण गर्न मौखिक रूपमा माग गरिएको छ, यसमा चीन सकारात्मक देखिएको छ,’ उनले भने, ‘जहाँ खोला करिडोर छ, त्यहाँबाट सवारीसाधन ओहोरदोहोर गर्न मिल्ने गरी पुल बनाउन माग गरिएको हो ।’ पछि सडक विभागले आफ्नो हिसाबले करिडोर बनाउने उनले सुनाए ।
पुल बनाउने कुरा डिजाइन समावेश गरेर पठाउन पनि चिनियाँ प्राविधिक टोलीसँग आग्रह गरिएको ओझाको भनाइ छ । कहाँ–कहाँ बस रोक्न मिल्ने हो, त्यो ठाउँ तोकेर डिजाइनमा राखिएको छ । चक्रपथ दोस्रो खण्डको काममा अब कुनै अलमल नहुने भौतिक पूर्वाधार तथा यातायात मन्त्रालयका सचिव केशवकुमार शर्माले जनाए । ‘डिजाइन फाइनल हुनासाथ चीनले ठेक्का आह्वान गर्छ,’ उनले भने, ‘सन् २०२६ जनवरीबाट ठेक्का लिने कम्पनीले फिल्डमा आएर काम नै थाल्ने तयारी भइरहेको छ ।कलंकीदेखि सीतापाइलासम्म सर्भिस लेनबाहेक अब आठ लेन सडक बन्नेछ ।
