२५ मंसिर, काठमाडौं । अमेरिकी पपस्टार टेलर स्वीफ्टले विश्व संगीतमा नयाँ कीर्तिमान रचेकी छन् । उनको बहुचर्चित ‘इरास टुर’ सांगीतिक इतिहासमा अहिलेसम्म धेरै कमाइ गर्ने सांगीतिक टुर बनेको छ ।
सोमबार अन्तिम दिन टुर सकिंदासम्म विश्वभर दुई बिलियनभन्दा धेरै टिकट बिक्री भएको द न्युयोर्क टाइम्सले उल्लेख गरेको छ । यो कमाइ संगीतको कुनै जनरा, कुनै युग र कुनै कलाकारले राखेको पहिलो कीर्तिमान भएको उल्लेख छ ।
कोल्डप्लेको कीर्तिमानलाई टेलरले तोडेकी हुन् । कोल्डप्लेको ‘म्युजिक अफ द स्फियर्स वर्ल्ड टुर’ सन् २०२२ देखि सुरु भएको हो, यो हाल पनि जारी छ । यी दुईको कमाइबीच ९०० मिलियन डलरको अन्तर रहेको बिलबोर्ड म्यागजिनले उल्लेख गरेको छ । २१ महिनासम्म चलेको टेलरको ‘इरास टुर’मा कुल एक करोडभन्दा धेरै दर्शक उपस्थित रहेको तथ्यांक पनि सार्वजनिक भएको छ ।
इरास टुर सन् २०२४ को मार्चमा एरिजोनाबाट सुरु भएको थियो, जुन ३ घण्टा बढी चलेको थियो । अन्तिम कन्सर्ट क्यानडाको भानकुभरस्थित बीसी प्लेस स्टेडियममा आयोजना गरिएको थियो ।
