बालाचतुर्दशीमा गलेश्वर शिवालयमा ६ लाख १२ हजार भेटी सङ्कलन

म्याग्दी, मङ्सिर ४ गते । म्याग्दीको बेनी नगरपालिका–९ मा अवस्थित प्रसिद्ध धार्मिक स्थल गलेश्वर शिवालयमा बालाचतुर्दशी पर्वको अवसरमा ६ लाख १२ हजार रुपियाँ भेटी सङ्कलन भएको छ ।

शिवालय क्षेत्र विकास कोषकी कोषाध्यक्ष कुमारी रोकाका अनुसार बुधबार परेको बालाचतुर्दशी मेला भर्न आएका भक्तजनले ६ लाख बाह्र हजार चार सय ३१ रुपियाँ भेटी चढाएका हुन् । उक्त भेटी गलेश्वर शिवालय क्षेत्र विकास कोष, जनप्रतिनिधी, सुरक्षा निकाय र स्थानीयबासीको उपस्थितिमा गणना गरी बिहीवार सार्वजनिक गरिएको हो ।

बालाचतुर्दशी पर्वमा गलेश्वरधाममा करिब तीस हजार भक्तजन सहभागी भएका शिवालय क्षेत्र विकास कोषले जनाएको छ ।गलेश्वर क्षेत्र विकास कोषका अध्यक्ष माधवप्रसाद रेग्मीका अनुसार गलेश्वर धाममा शतबीज छर्न यसपाली म्याग्दी, बागलुङ, पर्वत, पोखरा ,झापा, मोरङ, विराटनगर र काठमाडौँलगायतका जिल्लाहरूबाट भक्तजन आएका थिए । शिवालयमा शतबीज छर्नाले मृत आत्माले वर्षभरि खान पाउने तृप्ति हुने विश्वास गरिन्छ ।

हरेक वर्ष मङ्सिर कृष्ण चतुर्दशीका दिन जौ, धान, कालो तिल, गहुँ, तोरी, मास, केराउ, लावा, मुला, ज्यामिर, सखरखण्ड, पिँडालु र हलेदोका टुक्रा शतबीजका रूपमा छर्ने गरिन्छ । देशभरबाट गलेश्वर शिवालयमा आउने भक्तजनलाई पालैपालो शिवालयको दर्शन गर्न र सहज रूपमा मन्दिर परिसरबाट पवित्र कालीगण्डकी नदीसम्म शतबीज छर्ने वातावरण बनाइएको थियो ।

कालीगण्डकी नदी किनारमा एउटै नौ रोपनी चक्रशिलामा अवस्थित गलेश्वर शिवालय विश्वकै अलौकिक तीर्थस्थलको रूपमा परिचित छ ।_साधन घर्ती