काठमाडौँ, भदौ ८ : पटक पटक सर्दै आएको १०औँ राष्ट्रिय खेलकुद प्रतियोगिता अझै अनिश्चित बनेको छ । राष्ट्रिय खेलकुद परिषद् (राखेप) को बोर्ड बैठकले नयाँ मिति तोक्नु पर्ने भएकोले कर्णाली प्रदेशमा हुने प्रतियोगिता अनिश्चित बनेको हो ।
पदाधिकारीबिचको खिचातानीले राखेपको बाेर्ड बैठक बस्न सकेको छैन । यसअघि पछिल्लो पटक कर्णाली प्रदेशमा गत जेठ ३ देखि १० गतेसम्म आयोजना हुने गरी मिति तय गरिएको थियो ।
१०औँ राष्ट्रिय खेलकुदको लोगो र मस्कट सार्वजनिक गरिसकिएको छ । सरकारले मिति सरेपछि आर्थिक वर्ष २०८२/०८३ मा १०औँ आयोजनाका लागि ५४ करोड बजेट पनि विनियोजन गरेको छ ।
१०औँ खेलकुदको मस्कटमा लोपोन्मुख जनावर ‘रेडपान्डा’ रहेको छ । यस्तै लोगोमा सात रङ्ग, चन्द्र र सूर्य झन्डा अङ्कित रहेको छ । यसअघि राखेपले १०औँ खेलकुदको खेलाडी दर्ताका लागि अनलाइन पोर्टल र खेलकुदको डेडिकेटेड अनलाइन पोर्टल समेत सार्वजनिक गरेको थियो ।
जेठअघि २०८१ मङ्सिर र त्यसपछि यही चैतमा हुने भनिएको राष्ट्रिय खेलकुद पुन: जेठका लागि सारिएको थियो । चर्को गर्मीसँगै कर्णालीको सुर्खेतमा खेलाडीको आवासका लागि होटललगायत व्यवस्थापन गर्न थप चुनौती हुने देखिएपछि पुन: सरेको राष्ट्रिय खेलकुद खेलाडीका लागि व्यग्र प्रतीक्षा बनेको छ ।
दुई दुई वर्षमा आयोजना हुनुपर्ने राष्ट्रिय खेलकुदको पछिल्लो नवौँ संस्करण २०७९ सालमा पोखरामा भएको थियो ।
