१८ साउन, काठमाडौं : साउथ सुपरस्टार रजनीकान्तको बहुप्रतिक्षित फिल्म ’कुली’को ट्रेलर सार्वजनिक भएको छ । आमिर खानलाई ट्रेलरमा संक्षिप्तरुपमा चित्रण गरिएको छ ।
एक्सनले भरिपूर्ण ट्रेलरमा श्रुति हासन, नागार्जुन र सत्यराज पनि महत्वपूर्ण भूमिकामा छन्, जसले दर्शकलाई फिल्मको लागि उत्साहित बनाएको छ । लोकेश कनगराज निर्देशित फिल्मको ट्रेलरमा तस्करी र गुण्डागर्दीको झलक देख्न सकिन्छ । जब रजनीकान्तको पात्र देवा प्रवेश गर्छ, तब रमाइलो दोब्बर हुन्छ ।
फिल्ममा आमिर खान पनि महत्वपूर्ण भूमिकामा छन् । सुरुमा उनको पछाडिको दृश्य देखाइएको छ, जसमा उनले कालो भेस्ट लगाएका छन् र दुवै हातमा ट्याटु खोपेका छन् । एक ठाउँमा, उनले दुई बन्दुकले मैदानमा आफ्ना शत्रुलाई मारिरहेको देखिन्छ । ५५ मिनेट भित्र फिल्मको हिन्दी ट्रेलरले युट्युबमा १३ लाखभन्दा बढी भ्यूज पाएको थियो ।
दर्शकले यो फिल्मलाई बलिउडको ’वार २’ सँग तुलना गरिरहेका छन् । ’कुली’ १४ अगस्टमा रिलिज हुनेछ । यो अयान मुखर्जीको ऋतिक रोशन र जूनियर एनटीआर स्टारर ’वार २’ सँग भिड्नेछ । यो फिल्मले ए सर्टिफिकेट पाएको छ ।
