जनकपुर, २६ असारः मधेश प्रदेशका मुख्यमन्त्री सतिशकुमार सिंहले फरक क्षमता भएका व्यक्तिको शिक्षा तथा रोजगारीका लागि सीपमूलक प्रशिक्षण केन्द्र र सुविधासम्पन्न नमूना विद्यालय आवश्यक रहेको बताउनुभएको छ ।
आज जनकपुरधाममा आयोजित ‘अपाङ्गता, जलवायु परिवर्तन र जीविकोपार्जन सम्मेलन २०८२’ मा उहाँले स्थानीय र प्रदेश सरकार मिलेर यस्ता संस्थामा लगानी गर्नुपर्नेमा जोड दिनुभयो ।
मुख्यमन्त्री सिंहले पछिल्लो समयमा जलवायु परिवर्तका कारण फरक क्षमता भएका व्यक्तिहरू बढी जोखिममा रहेको भन्दै जोखिम न्यूनीकरण र अनुकूलन क्षमता बढाउनेतर्फ ध्यान दिनुपर्ने बताउनुभयो ।
जनकपुरधाम उपमहानगरपालिका प्रमुख मनोजकुमार साहले फरक क्षमता भएका व्यक्तिको वर्गीकरण गरी उपमहानगरपालिकाबाट काम भइरहेको र यस क्षेत्रमा अन्य संस्थाले गरेका काम पनि सराहनीय रहेका बताउनुभयो ।
लाइफ नेपालको योजना तथा अष्ट्रेलियन एडको आर्थिक सहयोग एवं सिविएम ग्लोबल संस्थाको समन्वयमा कार्यक्रम सम्पन्न भएको हो ।
