९ भदौ, काठमाडौँ । साफ यु-२० च्याम्पियनसिपको सेमिफाइनलमा आज नेपालले भुटानसँग खेल्दैछ। ललितपुरको सातदोबाटोस्थित एन्फा कम्प्लेक्समा आइतबार साँझ साढे ५ बजे खेल सुरू हुनेछ।
नेपाल समूह ‘ए’ को विजेता बनेर सेमिफाइनलमा पुगेको हो। समूह चरणमा नेपालले श्रीलंकालाई १-० र बंगलादेशलाई २-१ गोलले पराजित गरेको थियो। घरेलु मैदानमा च्याम्पियन बन्ने लक्ष्यसहित नेपालले आज सेमिफाइनल खेल्नेछ ।
भुटान समूह बी को उपविजेता हो। समूह बी बाट भुटान माल्दिभ्सलाई हराउँदै सेमिफाइनल पुगेको हो। समूह चरणमा भारतसँग भने पराजित भएको थियो। सेमिफाइनलको अर्को खेल सोमबार भारत र बंगलादेशबीच हुनेछ। प्रतियोगिताको फाइनल खेल बुधबार हुनेछ।
