काठमाडौँ, ६ फागुनः नेपालका आमसञ्चार तथा पत्रकारिता क्षेत्रका अग्रजहरूले राष्ट्रिय समाचार समिति (रासस)ले आगामी दिनमा समाचार सामग्रीमा विविधिता थप्दै जानुपर्ने र डिजिटल माध्यमलाई थप मजबुत बनाउने सुझाव दिनुभएको छ । रासस एकमात्र सरकारी सामाचार समिति भएकाले यसको जिम्मेवारी महत्त्वपूर्ण भएको प्रतिक्रिया दिनुभयो ।
सत्यतथ्य र निष्पक्षलाई मूलमन्त्र बनाएको राससले पछिल्ला समय २४ सैँ घण्टा समाचार सम्प्रेषण र विभिन्न मातृभाषामा समाचार बुलेटिन प्रकाशन गरिरहेको छ । राससको ६४ औँ वार्षिकोत्सव अवसरमा पत्रकारिता क्षेत्रका अग्रज सञ्चारविज्ञले दिनुभएको प्रतिक्रिया :
–हरिहर विरही, पूर्वसभापति, नेपाल पत्रकार महासङ्घ
रासस एकमात्र सरकारी समाचार समिति भएका कारण यसको ठूलो जिम्मेवारी रहेको छ । सूचनाको महत्त्व बढेको बेलामा परम्परागतभन्दा नयाँ क्षितिजतर्फ लाग्नु जरूरी छ । धेरैलाई लाग्छ नेपाल सरकारको स्वामित्व भएको हुनाले यसले धेरै स्वतन्त्रता पाउँदैन त्यो स्वभाविक पनि हो तर जनताको समस्या र आकांक्षालाई मुखरित गर्नको निमित्त सत्यतथ्य सूचना प्रवाह गरिरहेको सराहनीय छ । राससका आफ्ना सीमा र समस्या छन् त्यसलाई कसरी फराकिलो बनाउँदै जाने र थप विश्वसनीयता स्थापित गर्ने कुरामा जोड दिनुपर्छ ।
–निर्मला शर्मा, अध्यक्ष, नेपाल पत्रकार महासङ्घ
राससले खोजीमूलक समाचार र लेखहरूमार्फत समाज र जनताको आवाज अझ बुलन्द बनाउनुपर्छ । यस संस्थाले जनताको मुद्दा र आवाजलाई मूल प्रवाहकरण गर्नुपर्छ । देशका कुुनाकाप्चाबाट समाचार सङ्कलन र वितरण सेवालाई अझ बढि ‘डिजिटलाइज’ गरेर सबैमा सूचनाको पहुँच बढाउनुपर्छ ।
–चिरञ्जीवी खनाल, प्राध्यापक
आगामी दिनमा पनि राससले युग सुहाउँदा समाचार सम्प्रेषण गरी यस क्षेत्रका उपभोक्तालाई सरल र सहज रूपमा समाचार प्रयोग गर्न सुविधा उपलब्ध गराओस् । यो एआइको युगमा राससले पनि आफ्ना डेटालाई संरक्षण गर्न नितान्त जरूरी छ र डेटालाई सही रूपमा सदुपयोग गरेर सञ्चारमाध्यमार्फत जनसमूहलाई पुर्याउन भूमिका खेल्न शीघ्र रूपमा अघि बढोस् ।
–जगत नेपाल, वरिष्ठ पत्रकार
नेपालको पत्रकारिताको मूलधार छ त्यसलाई अहिलेसम्म जीवित बनाउनलाई राससको ठूलो भूमिका छ । अहिले पछिल्लो समयमा पत्रकारिताको परिवेश परितर्वन भएको छ । धेरै न्यूज मिडिया खुलेका छन् तर उनीहरूको जग कमजोर छ । एकदम कम लगानीमा मिडिया सञ्चालित छन् र राससकै भर परेका छन् । त्यसैले राससले विविध ‘कन्टेन्ट’ उत्पादन गर्नुपर्छ । राससले नेपाली राष्ट्रियतालाई जगेर्ना गर्ने, विकास निर्माण र राष्ट्रिय हितको पक्षमा समाचार उत्पादन गर्दै आएको छ र अझै गर्नुपर्छ । राससले अझै खोजी समाचारमा बल पुर्यओस् । विभिन्न कोणबाट समुदाय, क्षेत्र, वर्गलाई समेटेर दूरदराजको समाचारहरू अझै ल्याओस् ।
–बबिता बस्नेत, वरिष्ठ पत्रकार
रासस ऐतिहासिक समाचार संस्था हो । यसले ६४ वर्ष पार गर्नु आफैँमा गौरवको कुरा छ । राससमा हाल फरकपन देखिन्छ । सामाचार तुरून्तै आउने र अपडेट पनि राम्रो छ । नेपाल भाषा र मैथिली भाषा पनि ल्याएको छ । मिडियाप्रतिको विश्वसनीयता गुम्दै गएको बेला राससमा आएका समाचार सामग्री सही हुन्छन् भन्ने विश्वसनीयता बनाइराख्नु एकदमै जरूरी छ । आगामी दिनमा डिजिटल माध्यममार्फत थप अघि बढोस् र अन्तरपुस्तामा पुग्न सकोस् ।
–गुणराज लुइँटेल, सम्पादक, नागरिक दैनिक
रासस भन्ने बित्तिकै सञ्चार माध्यमसँग अभिन्न रूपमा जोडिएको संस्था हो । हामीजस्ता सञ्चारमाध्यम आफ्नो उत्पादन त छँदैछ समाचार र फोटोमा निर्भर हुन्छौँ । राससले उत्पादन गर्ने समाचार तथ्यपूर्ण हुन्छन् । राससले हाम्रो काम गराइलाई सहजता थपेको छ । यो सार्वजनिक संस्था भएकाले बढीभन्दा बढी आममानिसका समस्यालाई उजागर गर्दै र समाचार संस्थासँग समन्वय गर्दे अगाडि बढ्नु उचित हुन्छ ।
–बालकृष्ण ज्ञवाली, कारोबार दैनिक
विगतको तुलनामा राससको सेवा प्रवाह राम्रो हुँदै गएको छ । समाचारका विषयवस्तुमा विविधिता र अडियो/भिडियोमा स्तरीयता देखिएको छ । समग्रमा राससको सेवा विगतको भन्दा स्तरीय र पठनीय छ । हाल राससको टिमले सेवालाई थप मजबुत र स्तरीय बनाएको देखिन्छ । चौबीस घण्टा सेवा दिनु कठिन काम हो, पछिल्लो समय त्यो थियो । सरकारी निकायको समितिले भाषामा थप स्तरीयता र समयअनुसार क्षेत्रगत समाचार पस्किनुपर्नेछ ।
–शिव गाउँले, प्रधानसम्पादक, अनलाइनखबर डट कम
निजी क्षेत्रका आम सञ्चारमाध्यमले ध्यान पुर्याउन नसकेका वा भनौँ उनीहरूको प्राथमिकतामा नपरेका विषयवस्तुमा राससले ध्यान केन्द्रित गर्नुपर्छ । अझ भनौँ व्यावसायिक मिडियाले बिकाउ नठानेका, ‘सेलेबल’ नमानेर बेवास्ता गरिरहेका विषयहरूलाई समाचार सामग्रीको रूपमा ‘कभरेज’को दायरामा ल्याउने कामलाई राससले अझै व्यापकता दिँदै जाओस् । जनताको करबाट चलेको यस संस्था वास्तवमै जनताको संस्था बनोस् ।
–मातृका पौडेल, प्रधानसम्पादक, नेपाल प्रेस
पछिल्ला वर्षहरूमा राससले केही सुधार गर्दै लगेको छ । राससको ग्राहकले के चाहन्छ र रूचाइन्छ भन्ने मध्यनजर गर्दै बाइलाइन समाचारहरू आइरहेका छन् । हामीले खर्च पर्ने ‘स्टोरी’ हरू अहिले राससबाट आइरहेका छन् । मानवीय अभिरूचिका समाचारसँगै ब्रेकिङ न्यूजहरू दिन सके अझ बढी उपयुक्त हुन्थ्यो । राससले स्रोत साधनको उच्चतम प्रयोगले विश्वसनीयता, प्रभावकारीता र अपरिहार्यता अझै बढनेछ ।
–मोहन मैनाली, वरिष्ठ पत्रकार
पछिल्लो समय राससले फोटो र अडियो भिडियोमा समाचार सामग्री उपलब्ध गराउँदै आएको छ । त्यो एकदमै राम्रो लागेको छ । समाचार सामग्री वितरणमा प्रविधिको प्रयोगलाई निरन्तरता दिएको खण्डमा नेपाली जनतालाई राससको ठूलो गुण हुनेछ ।
–राजेन्द्र दाहाल, वरिष्ठ पत्रकार
रासस नयाँ भइरहनु पर्दैन । रासस जे उद्देश्यका लागि स्थापना भएको हो । त्यसमा समयसापेक्ष ढङ्गबाट अघि बढ्न सके औचित्य त्यसैबाट पुष्टि हुन्छ । राससले देशभरका सूचना देशभर नै पु¥याउने उद्देश्यअनुरूप काम गर्नुपर्छ । सम्पादकीय नीति आवश्यक छैन, तर सूचनालाई तटस्थ रूपमा सूचना प्रवाह गर्नुपर्छ ।
–विमला तुम्खेवा, अध्यक्ष, सञ्चारिका समूह
राससले नेपालको लोकतन्त्र, सुशासन र विकासको निम्ति पत्रकारिताको माध्यमबाट पुर्याएको योगदान ऐतिहासिक र अतुलनीय रहेको छ ।
–माधव तिवारी, दैनिकी डटकम, प्रधासम्पादक
रासस नेपाली जनतालाई सुुसूचित गराउने र नेपाली मिडियाको पनि एउटा सूचनाको प्रमुख स्रोत रहेको छ । राससले दिने सेवाहरू जसले समाचार उत्पादन गरेर अरू सञ्चारमाध्यमलाई वितरण गर्दै आएको छ । नागरिक स्तरका मसिना कुराहरूले राससले उठान गरेको छ । आगामी दिनमा थप राम्रा समाग्री सम्प्रेषण गर्दै जाओस् ।
