रवि–छवि सहकारी ठगी मुद्दा फेरि स्थगित

बुटवल, मङ्सिर २५ गते । रास्वपा सभापति रवि लामिछाने र गोर्खा मिडियाका तत्कालीन सञ्चालक छविलाल जोशीमाथि दायर सहकारी ठगीसम्बन्धी मुद्दाको पेसी आज पनि स्थगित गरिएको छ।

कात्तिक १३ गतेदेखि लगातार सारिँदै आएको यो मुद्दा आज न्यायाधीश सागर विष्टका आफन्त जाहेरवाला कानुन व्यवसायी परेकाले ‘हेर्न नमिल्ने’ सूचीमा राखिएको अदालतका सूचना अधिकारी रामबहादुर कुँवरले बताए।

सुप्रिम सहकारी ठगी र सङ्गठित अपराध अभियोगमा थुनामा रहेका लामिछाने र जोशीको मुद्दा कात्तिक १३ पछि निरन्तर सारिँदै आएको छ। यसअघि दुई पटक लामिछानेका कानूनी व्यवसायीका निवेदनका आधारमा तथा एकपटक सार्वजनिक बिदाका कारण पेसी स्थगित भएको थियो। छविलाल जोशी पक्षले निवेदन दिएपछि कात्तिक १३ गतेको प्रारम्भिक सुनुवाइ पनि रोकिएको थियो।

यस मुद्दामा न्यायाधीश मिलनकुमार राई र ओमप्रसाद अर्यालको इजलासले दुवै प्रतिवादीको मुद्दा एउटै प्रकृतिको भएकाले संयुक्तरूपमा सुनुवाइ गर्न आदेश गरेको छ।

लामिछानेले सहकारीको अपचलनमा आफ्नो हिस्साको बिगो रकम दाखिला गरेका भए पनि जिल्ला अदालत रुपन्देहीका न्यायाधीश नारायण सापकोटाले साउन २६ गते उनीलाई जमानतमा रिहा गर्ने निवेदन अस्वीकार गरेका थिए।

बिगो रकम चार भागमा बाँडिएकोमा लामिछानेले करिब २ करोड ७४ लाख ८४ हजार रुपैयाँको बैंक जमानत पत्र पेश गरेका थिए। जोशीले पनि आफूअनुसारको बिगोबापत जमानत पेस गरेका थिए। तर, दुवैको वास्तविक बिगो कति पर्छ भन्ने स्पष्ट नभएकाले अदालतले रिहा गर्न नमिल्ने आदेश जारी गरेको हो।

हाल पुर्पक्षका लागि लामिछाने र जोशी दुवै कारागारमा रहेका छन्। भैरहवा कारागारमा रहेका लामिछानेलाई ललितपुरको नख्खु कारागार स्थानान्तरण गरिएको छ भने जोशी भैरहवामै रहेका छन्।