एक हप्ता नपुग्दै फिल्म ‘धुरन्धर’ को कमाइ १६८ करोड

काठमाडौँ, २५ मङ्सिर : रणवीर सिंह स्टारर जासूसी थ्रिलर फिल्म ‘धुरन्धर’ले यतिबेला राम्रो व्यापार गरिरहेको छ ।

पाकिस्तानमा आधारित यस एक्सन–प्याक्ड स्पाइ ड्रामामा रणवीर एक भारतीय जासूसको भूमिकामा छन् । फिल्मले रिलिजको छैठौँ दिनसम्म १६८. ३२ करोड कमाइ गरेको छ । बुधबारसम्मको रिपोर्टअनुसार छैठौं दिनमा मात्र फिल्मले १५ करोड भन्दा माथिको व्यापार गरेको थियो ।

फिल्ममा रणविरसँगै सञ्जय दत्त, आर. माधवन, अक्षय खन्ना र अर्जुन रामपाल जस्ता कलाकारको प्रभावकारी अभिनय छ । फिल्मलाई आदित्य धरले निर्देशन गरेका हुन् ।

फिल्ममा अक्षय खन्नाले निर्वाह गरेको पाकिस्तानी अपराधी तथा नेता ‘रहमान डकैत’को भूमिका पनि यतिबेला सामाजिक सञ्जालमा चर्चाको विषय बनेको छ । उनका अभिनयको व्यापक प्रशंसा भइरहेको छ ।

अभिनेत्री अमिषा पटेलले अक्षयसँगको एउटा पुरानो तस्वीर शेयर गर्दै लेखेकी छन्, ‘तब पनि महान, अहिले त झनै महान ! यी हुन् अक्षय खन्ना, जसलाई म प्रेमपूर्वक ‘अक्शु’ भन्छु । बिलकुल विनम्र, अहंकारबिहीन । सायद उनलाई थाहा पनि छैन कि २०२५मा उनले आफ्नो अभिनयले पूरै देशलाई मोहित बनाइदिएका छन् ।’