नेपालमा पनि टेक्ने ठाउँ राख्न गैरआवासीय नेपालीलाई प्रधानमन्त्रीको सुझाव

काठमाडौँ, मङ्सिर १४ गते । प्रधानमन्त्री सुशीला कार्कीले विदेशमा बस्ने नेपालीहरूलाई नेपालमा भएको सम्पत्ति बेचबिखन गरेर नलैजान आग्रह गरेकी छन् । आइतबार आयोजित गैरआवासीय नेपाली संघको एकता घोषणा कार्यक्रममा उनले नेपालमा आफ्नो सम्पत्ति सुरक्षित राख्न आग्रह गरेकी हुन् ।

‘जो विदेशमा हुनुहुन्छ, उहाँहरूले नेपालमा एउटा आफ्नो स्थान चाहिँ राख्नुपर्छ, यहाँ मेटाउनु हुँदैन । चाहे एउटा फ्ल्याट नै किन नहोस् । एउटा राख्नुपर्छ, आफ्नो टेक्ने ठाउँ,’ उनले भनिन् ।

गैरआवासीय नेपालीलाई सरकारले दोस्रो दर्जाको नागरिकको रूपमा नहेरेको बताउँदै उनले विदेशमा रहेका नेपालीको सम्पत्तिको सुरक्षा सरकारले गर्ने बताइन् ।

उनले हाल विश्वभर बाहिरका मान्छेलाई बस्न नदिने खालको चलन चलेको उल्लेख गर्दै नेपालमा एउटा कोठा मात्रै भए पनि सुरक्षित राख्न आग्रह गरिन् । उनले सरकारले गैरआवासीय नेपालीहरूका समस्या बिस्तारै सम्बोधन हुँदै जाने बताइन् । गैरआवासीय नेपालीहरूले विगतमा पनि सहयोग गरेको उल्लेख गर्दै उनले आगामी दिनमा पनि लगानी गर्न आग्रह गरिन् ।

उनले गैरआवासीय नेपाली संघको एकताले नेपालमा रहेका राजनीतिक दलहरूलाई एकता गर्नुपर्ने सन्देश दिएको बताइन् ।नेपालमा राजनीतिक दलहरूमा विभाजन देखिएको उल्लेख गर्दै उनले विभाजनले कसैलाई पनि राम्रो नगर्ने बताइन् ।