जेरुसेलम, असोज २४ गते । इजरायली प्रधानमन्त्री बेन्जामिन नेतान्याहुको कार्यालयले शुक्रबार सरकारले हमाससँग बन्धक मुक्तिको सम्झौतालाई अनुमोदन गरेको बताएको छ । योसँगै दुवै पक्ष गाजामा दुई वर्षभन्दा लामो युद्ध र शत्रुता अन्त्य गर्ने सम्झौताको सफलता नजिक पुगेका छन् ।
इजरायलले सबै पक्षले युद्धविराम सम्झौताको पहिलो चरणमा हस्ताक्षर गरेको उल्लेख गर्दै हमासले बन्दीहरूलाई मुक्त गरेपछि मात्र युद्धको अन्त्य हुने बताएको थियो । अमेरिकी राष्ट्रपति डोनाल्ड ट्रम्पले इजिप्टमा भएको यो सम्झौताले गत महिना गाजाका लागि घोषणा गरेको २०-सूत्रीय शान्ति योजनालाई आत्मसात् गरेको बताउँदै आइतबार मध्य पूर्वका लागि प्रस्थान गर्ने योजना बनाएको बताउनुभएको छ ।
इजिप्टले सम्झौताको समापन मनाउन एउटा कार्यक्रमको योजना बनाइरहेको छ, जसका लागि ट्रम्प पनि इजरायलमा रोकिने अपेक्षा गरिएको छ । इजरायली सरकारले सम्झौता अनुमोदन गर्न बिहीबार बैठकको २४ घण्टाभित्र युद्धविराम गर्ने बताएको थियो, जस अन्तर्गत अन्ततः इजरायली सेना गाजाबाट फिर्ता हुनुपर्नेछ । नेतान्याहुको कार्यालयले शुक्रबार विज्ञप्ति जारी गर्दै सरकारले जीवित र मृतक सबै बन्धकको रिहाइलाई अनुमोदन गरेको जनाएको छ ।
जसका लागि नेतान्याहुले दक्षिणपन्थी सहयोगीबाट दबाबको सामना गर्नुपरेको थियो । राष्ट्रिय सुरक्षा मन्त्री इटामार बेन गभिरले गाजामा बाँकी रहेका ४७ जना बन्धकको बदलामा हजारौं प्यालेस्टिनी कैदीलाई रिहा गर्ने योजनालाई असहनीय भन्दै सम्झौताको विरूद्ध मतदान गर्ने बताउनुभएको थियो ।
इजरायल र गाजामा उत्सव र विश्व नेताले सम्झौताको प्रशंसासहितको सन्देशको बावजुद, हमासलाई निःशस्त्र बनाउने योजनाको आह्वान र ट्रम्पको नेतृत्वमा गाजाको लागि प्रस्तावित सङ्क्रमणकालीन अधिकारसहित धेरै मुद्दा विचाराधीन छन् । हमासका वरिष्ठ अधिकारी ओसामा हमदानले प्यालेस्टिनी इस्लामवादी आन्दोलनले प्रस्तावलाई अस्वीकार गरेको बताउनुभएको छ ।
यद्यपि हमासले आफ्नो हतियार आत्मसमर्पण गरेको सवाललाई शान्ति योजनाको दोस्रो चरणमा सम्बोधन गरिने ट्रम्पले बताउनुभएको छ । वरिष्ठ अमेरिकी अधिकारीले अमेरिकी सेन्ट्रल कमान्डका प्रमुख एडमिरल ब्राड कुपरको नेतृत्वमा २०० जनाको सैन्य टोली मध्यपूर्वमा युद्धविरामको निरीक्षण गर्न तैनाथ गरिने बताएका छन् ।
पहिलो चरणको मस्यौदामा बिहीबार “सबै पक्ष” द्वारा हस्ताक्षर गरिएको पुष्टि गर्दै इजरायली सरकारका प्रवक्ता सोश बेड्रोसियानले पत्रकारलाई भन्नुभयो “हाम्रा सबै बन्धक, जीवित र मृतक, ७२ घण्टापछि रिहा हुनेछन् ।
