काठमाडौँ, ५ फागुनः राससले संसदीय गतिविधिसँग सम्बन्धित समाचार सङ्कलन र सम्प्रेषण कार्य हामीले पनि अध्ययन गरिरहेकै छौँ । राससबाट निष्पक्ष र सन्तुलित समाचारका लागि भएका प्रयासमा समर्थन छ । यस कार्यका लागि तपाईहरू प्रशंसायोग्य हुनुहुन्छ । आगामी दिनमा पनि यही खाले भूमिकामा रहनुहोला । स्वभाविक रूपमा रासस सरकारको एउटा महत्वपूर्ण अङ्ग हो । सरकारप्रति जवाफदेही र उत्तरदायी हुनुपर्छ । सरकार भन्नासाथ सम्पूर्ण राष्ट्र, जनता, सबैखाले मनोविज्ञानको पाटोलाई बिर्सन हुन्न । सरकार भन्नासाथ प्रधानमन्त्री, मन्त्री र राजनीतिक दलमात्रै बुझियो भने त्यसको सीमा साँघुरो हुन्छ ।
सञ्चारमाध्यमबाट सम्प्रेषण गरिएका समाचारलाई सरसर्ती विश्लेषण गर्दा कुन व्यक्ति बोल्यो भन्ने आधारमा स्थान पाउने र दिइएका समाचार बढाइचढाइ गरेको देखिन्छ । हामी गणतान्त्रिक शासन व्यवस्थामा छौँ तर पनि हाम्रो मनोविज्ञान, अभिव्यक्ति र कामकारबाही पुरानै छ । पात्रभन्दा प्रमुख विषय हो । अभिव्यक्तिको सन्देश के हो भनेर हेर्नुपर्छ । सामान्य किसानका विषयवस्तुमा पनि समाजमा गहिरो प्रभाव पार्ने सन्देश हुनसक्छ । त्यस्ता गतिविधि राससजस्ता समाचार गृहले समेट्न सक्नुपर्छ । उच्च ओहदामा बस्ने व्यक्तिले बोलेको ठीक तथा दुर्गम र पछि पारिएका समुदायका आवाज बेठीक भन्ने हुनुहुँदैन । विषयवस्तुका आधारमा समाचार बनाइनुपर्छ । जसले समाजमा सकारात्मक सन्देश प्रवाह गर्न सकोस् ।
यसर्थ व्यक्ति होइन विषयवस्तु वा सन्देश प्रधान हुनुपर्छ । समाचार अनुसन्धान र खोजमूलक हुनुपर्छ । म एउटा सन्दर्भ यहाँ उल्लेख गर्न आवश्यक ठान्छु, बीस वर्ष जेल सजाय भोगेपछि भएको फैसलामा निर्दाेष सावित हुनेले अब कहाँबाट न्याय पाउने भनेर पनि समाचारले स्पष्ट पार्नसक्नुपर्छ । निर्दाेष व्यक्तिले सजाय भोग्न नपर्ने गरी समाचार लेखिनुपर्छ । त्यो तपाईहरूको जिम्मेवारीभित्र पर्छ ।
(राससको ६४ औँ वार्षिकोत्सवका सन्दर्भमा आयोजित अन्तर–संवादमा नेकपा (एकीकृत समाजवादी)का प्रमुख सचेतक मेटमणि चौधरीबाट व्यक्त विचार)
