एकीकृत निर्वाचन सुरक्षा योजना–२०८२ स्वीकृत

काठमाडौँ, कात्तिक ३० : आगामी फागुन २१ गते घोषणा गरिएको प्रतिनिधि सभा सदस्य निर्वाचन स्वच्छ, निष्पक्ष र भयरहित ढंगमा सम्पन्न गर्न गृह मन्त्रालयले एकीकृत निर्वाचन सुरक्षा योजना–२०८२ स्वीकृत गरेको छ।

गृह मन्त्रालयमा आइतबार गृहमन्त्री ओमप्रकाश अर्यालको अध्यक्षता बसेको केन्द्रीय सुरक्षा समितिको बैठकले एकिकृत निर्वाचन सुरक्षा योजना स्वीकृत गरेको गृह प्रवक्ता तथा सहसचिव आनन्द काफ्लेले बैठकपछि संचारकर्मीलाई जानकारी दिनुभयो।

एकीकृत निर्वाचन सुरक्षा योजना तर्जुमा गर्नका लागि गृहले सहसचिव तथा शान्ति सुरक्षा महाशाखा प्रमुख काफ्लेको संयोजकत्वमा चारवटै सुरक्षा निकायका प्रतिनिधि सदस्य रहने गरी एकीकृत निर्वाचन सुरक्षा योजना कार्यदल असोज ९ गते बसेको बैठकले गठन गर्ने निर्णय गरेको थियो।

यस्तै बैठकले स्वीकृत निर्वाचन सुरक्षा योजना अनुरुप निर्वाचन प्रयोजनार्थ नेपाली सेनाको परिचालनका लागि राष्ट्रिय सुरक्षा परिषदसमक्ष सिफारिस गर्न रक्षा मन्त्रालयलाई लेखि पठाउने निर्णय गरेको प्रवक्ता काफ्लेले जानकारी दिनुभयो। त्यसैगरी, गृह मन्त्रालयले निर्वाचन लक्षित प्रदेशस्तरीय सुरक्षा गोष्ठी गर्न मङ्सिर ९ गतेबाट सुरु हुने गरी लुम्बिनी प्रदेशबाट आयोजना गर्ने निर्णय गरेको उहाँले जानकारी दिनुभयो।

प्रवक्ता काफ्लेका अनुसार निर्वाचन अवधीभर देशमा हिँसा भड्काउने, जनतालाई आतङ्कित बनाउने गतिविधिलाई निस्तेज गर्न कडाइका साथ कानुनी कारवाही अगाडी बढाउनेसमेत जानकारी दिनुभयो।

बैठकमा गृह मन्त्रालयका सचिव रामेश्वर दंगाल, नेपाली सेनाका एकजना रथी, नेपाल प्रहरी र सशस्त्र प्रहरीका महानिरीक्षक, राष्ट्रिय अनुसन्धान विभागका प्रमुख, मन्त्रालयका शान्ति सुरक्षा महाशाखा प्रमुख काफ्ले लगायतको सहभागिता थियो।