त्रिशूली (नुवाकोट), ६ माघः बागमती प्रदेशका मुख्यमन्त्री बहादुरसिंह लामाले सामुदायिक विद्यालयको शैक्षिक गुणस्तर वृद्धिका लागि सरोकारवाला पक्ष जिम्मेवार हुनुपर्ने बताउनुभएको छ ।
यहाँको विदुर नगरपालिका–१३ स्थित अजिङ्गरे माध्यमिक विद्यालयको वार्षिकोत्सव कार्यक्रमलाई आज सम्बोधन गर्दै मुख्यमन्त्री तामाङले सामुदायिक विद्यालयको शैक्षिक गुणस्तर वृद्धि गराउन सबै पक्षलाई जिम्मेवार हुन आग्रह गर्नुभयो ।
सामुदायिक विद्यालयको सुधारका लागि सरकार, अभिभावक, व्यवस्थापन समिति, शिक्षक र कर्मचारी सबैको समान जिम्मेवारी भएकाले त्यसको पालना गराउन बागमती प्रदेश सरकार प्रयासरत रहेको उहाँले बताउनुभयो । “सरकारी लगानीमा सुविधासम्पन्न भौतिक संरचना, दक्ष शिक्षक, निःशुल्क शिक्षा र खाजाको प्रबन्ध मिलाए पनि सोहीअनुसार नतिजा पाउन सकिएको छैन,” मुख्यमन्त्री तामाङले भन्नुभयो, “सामुदायिक विद्यालयका राम्रा पक्ष संस्थागत विद्यालयमा अनुसरण होस् भन्ने चाहेका छौँ । तर एकाधमा बाहेक त्यसो गराउन सकिएको छैन ।”
विदुर नगरपालिकाका प्रमुख राजन श्रेष्ठले प्राविधिक र व्यावहारिक सिकाइमार्फत विद्यार्थीको क्षमता वृद्धिमा स्थानीय सरकार केन्द्रित भएको बताउनुभयो । स्थानीय पाठ्यक्रम जारी गर्दै यहाँको सिप, संस्कृति र संस्कारसहितको व्यावहारिक शिक्षामार्फत गुणस्तर वृद्धि गराउने प्रयास भइरहेको उहाँले जानकारी दिनुभयो ।
वार्षिकोत्सवका अवसरमा विद्यालयका कक्षागत र विभिन्न रचनात्मक प्रतियोगितामा उत्कृष्ट भएका विद्यार्थीलाई मुख्यमन्त्री तामाङले प्रशंसापत्रसहित सम्मान गर्नुभयो ।
