२६ कात्तिक, काठमाडौं । साउथ सुपरस्टार सूर्या र बलिउड अभिनेता बबी देओल आगामी फिल्म ‘कंगुवा’मा एकसाथ देखिंदैछन् । फिल्मको हिन्दी ट्रेलर सार्वजनिक भएको छ, जुन सशक्त, भव्य र खतरनाक देखिन्छ । फिल्मको झलकले हलिउडलाई प्रतिस्पर्धा दिने विश्लेषण भारतीय सञ्चारमाध्यमको छ ।
एक मिनेट ३० सेकेन्डको ट्रेलरले कथावस्तु दर्शाउँछ । ट्रेलरको सुरुमा एक महिला चिच्याउँदै भनिरहेकी हुन्छिन्- ‘कालो जंगलमा बाघको बथान गर्जिरहेको छ, पृथ्वीमा बिजुली झरेको छ । त्यसैले कंगुवा आइपुग्यो भनेर बुझ्नुहोस् ।’ ट्रेलरमा सूर्याको लुक्सले दर्शकलाई आकर्षित तुल्याउन सक्छ । बबी देओलको लुक्स पनि दमदार देखिन्छ । ट्रेलरमा सूर्या दुई भिन्न अवतारमा प्रस्तुत छन् । ट्रेलरले प्रशंसकलाई पक्कै पनि उत्साहित तुल्याउन सक्छ ।
दर्शकले यसलाई यस वर्षको सबैभन्दा ठूलो ओपनिङ फिल्मको रुपमा विश्लेषण गर्न थालेका छन् । ‘पुष्पा’, ‘सिंघम’ लगायत अन्य धेरै ठूला फिल्मसँग प्रतिस्पर्धा गर्ने भनिएको फिल्म ३५० करोड भारुभन्दा बढीको बजेटमा बनेको बताइएको छ । कतिपयले यसलाई साउथको सर्वोत्कृष्ट फिल्म भनेका छन् । कोहीले ‘बाहुबली २’ लाई पनि उछिन्ने अड्कल काटेका छन् ।
फिल्मलाई भारतका विभिन्न स्थान र सात देशमा छायांकन गरिएको छ । सिरुथाई शिवद्वारा निर्देशित ‘कंगुवा’ एक काल्पनिक एक्सन फिल्म हो, जुन शुक्रबार रिलिज हुँदैछ । फिल्ममा सूर्या र बबी देओलसहित दिशा पटानी, नटराजन सुब्रमण्यम, जगपति बाबु, योगी बाबु, रादिन किंग्सले, कोभाई सरला, आनन्दराज, मारिमुथु, दीपा भेनकट, रवि राघवेन्द्र र केएस रविकुमार पनि देखिनेछन् ।
