उपमहासचिवदेखि सदस्य पदका लागि २० थारु नेता मैदानमा

काठमाडौं, पुस १ : नेकपा (एमाले) को ११ औं महाधिवेशनको चौथो दिन आज मतदान हुने भएको छ । अपरान्ह ४ बजेपछि मतदान हुने एमाले केन्द्रीय निर्वाचन आयोगका अध्यक्ष डा. विजय सुब्बाले बताउनुभयो ।

१९ पदाधिकारीसहित ३०१ सदस्यीय कार्य समितिमा थारु समुदायबाट २० जना नेताहरु (१३ पुरुष र ७ महिला) चुनावी मैदानमा होमिनुभएको छ । लुम्बिनी प्रदेशका पूर्वमन्त्री वैजनाथ चौधरी (नवलपरासी) उपमहासचिवमा उम्मेदवारी दिनुभएको छ । थारु समुदायबाट पदाधिकारीमा उम्मेदवारी दिनुभएको उहाँ एक्लो थारु हुनुहुन्छ ।

त्यसैगरी केन्द्रीय सदस्यमा खुलातर्फ नारदमुनि रानाथारु (कैलाली) र थारु क्लस्टर खुलाबाट कृपाराम रानाथारु (कञ्चनपुर) ले उम्मेदवारी दिनुभएको छ । त्यस्तै, मधेसबाट खुल्ला केन्द्रीय सदस्यमा राजकुमार लेखी (सप्तरी), ताराकान्त चौधरी (बारा) ले उम्मेदवारी दिनुभएको छ ।

सोही अनुसार थारु क्लस्टर खुलाबाट कृष्णी चौधरी थारु (बर्दिया), गौरीशङ्कर चौधरी (कैलाली), तुलसीप्रसाद चौधरी, नरुलाल चौधरी (दाङ), वलवीरप्रसाद चौधरी (उदयपुर), विश्रामप्रसाद चौधरी (कपिलवस्तु), सत्यनारायण चौधरी (सिराहा) ले उम्मेदवारी दिनुभएको छ ।

त्यस्तै, थारु महिला क्लस्टरबाट कमला चौधरी (कञ्चनपुर), जागेश्वरीदेवी चौधरी, मञ्जुकुमारी चौधरी (उदयपुर), शान्ता चौधरी (दाङ) ले उम्मेदवारी दिनुभएको छ । सोही अनुसार श्रमिक तर्फबाट जनक चौधरी, खुला महिलामा पूर्वमन्त्री भगवती चौधरी (सुनसरी), शिवकुमारी चौधरी (कपिलवस्तु को उम्मेदवारी परेको छ । त्यस्तै, केन्द्रीय लेखा आयोग सदस्यमा कमलकिशोर चौधरीले उम्मेदवारी दिनुभएको छ ।

महाधिवेशनमा अध्यक्ष केपी शर्मा ओली प्यानल र वरिष्ठ उपाध्यक्ष ईश्वर पोखरेलको गरी दुई प्यानल र स्वतन्त्रबाट समेत उम्मेदवारी दिनुभएका थारु नेताहरु दुवै अध्यक्षको प्यानलमा बाँडिएर उम्मेदवारी दिनुभएको छ । प्यानलमा नपरेकाहरु भने स्वतन्त्रबाट उम्मेदवारी पेश गरिएको कैलालीका नारदमुनि रानाथारुले बताउनुभयो ।