इनरुवा, असोज ३१ : सुनसरीको सीमावर्ती कोशी गाउँपालिका १, २ र ३ नम्बर वडाको राजमार्ग क्षेत्रमा स्थानीय गौरीशङ्कर एग्रो इन्डष्ट्रिज प्रालिको दाना उद्योगका कारणले डुबानमा परेको गुनासो बाहिर आएको छ ।
दुई हप्ता अघि आएको बाढीको पानी निकासको बन्द गर्ने गरी उद्योग सञ्चालन भएकाले उद्योगकै कारणले राजमार्ग उतरको भाग कोशी २ र ३ को पश्चिम कुुशाहा तथा कोशी १ र ३ को दक्षिणतर्फको भाग लौकही डुबानमा परेको गुनासो स्थानीयहरुले गरेका छन् ।
दाना उद्योगका कारणले सयौं बिघा धान र उखु खेत डुबानमा परेको स्थानीय शिवनारायण उरावँले गुनासो गर्नुभएको छ । झण्डै ११ विगा क्षेत्रफलमा फैलिएको उद्योगको क्षेत्रमा राजमार्गभन्दा अग्लो हुने गरी भरेको र संरचना निर्माण गरेको कारणले उतर तर्फको पानी निर्वाद रुपमा बग्न नपाएकाले बस्तीदेखि धानखेतसम्म डुबानमा परेको स्थानीय बाशिक आलमले गुनासो गर्नुभयो ।
कोशी ३ का उमर अन्सारीले आफूहरुको बस्ती उद्योगका कारणले डुबानमा परेको दाबी गर्नुहुँदै उद्योगको बिचबाट पुल वा निकासको कुनै माध्यम बनाउनुपर्ने सुझाव दिनुभयो । उहाँले डुबानको गुनासो आफ्नो मात्रै नभई बस्तीभरीकै गुनासो भएको बादी गर्नुभएको छ । बाल र संरचनाका कारणले डुबानमा पर्ने एकातिर समस्या रहेको छ भने अर्को तर्फ उद्योगको प्रदूषणले मानव स्वास्थ्यमा समस्या भएको, धुलो र सिधा पेलेको दिन बस्ती नै दुर्गन्ध हुने गुनासो स्थानीयहरुले गरेका छन् ।
उद्योगका कारणले डुबान र प्रदूषण बढेको गुनासो बाहिर आएको विषयमा कोशी गाउँपालिकाका अध्यक्ष ऐयुब अन्सारीले उद्योग प्रशासनलाई पटक पटक सचेत गराएको तर सहमति गरेर कार्यान्वन नगरेको प्रतिक्रिया दिनुभएको छ । उद्योगले मापदण्ड अनुसारको काम नगर्दा समस्या भएको र आफूहरुको गाउँपालिकामा सहमति गरेका वाचाहरु समेत पूरा नगर्दा समस्या देखिएको बताउनुभयो । उद्योगका कारणले प्रदूषण र डुबानमा परेको गुनासो बाहिर आएको विषयमा फेरि उद्योगसँग छलफल गर्ने प्रतिक्रिया दिनुभयो ।
यसैबिच, गौरीशङ्कर एग्रो इन्डष्ट्रिज प्रालिका प्रमुख टीका पोखरेलले आफूहरुका कारणले नभई वर्षा र बाढीले डुबानमा परेको हुनसक्ने बताउनुहुँदै बरु आफूहरुले प्रदूषण निणन्त्रण गर्ने उपकरणको प्रयोग गरेको दाबी गर्नुभयो ।
आफूहरुले ११ विगा क्षेत्रफलमा पशुपन्छी, माछा तथा कुखुराको दाना उत्पादन गर्ने गरी तीन वर्षअघि स्थापना गरेको र गत वर्षदेखि मकै खरिद गरी त्यसबाट दाना उत्पादन गरेर बजारमा पठाउँदै आएको पोखरेलले बताउनुभयो । उहाँले उद्योग आएपछि मात्रै डुबानमा नपरेको र त्यसअघि समेत होचो ठाउँ भएकाले केही डुबानमा पर्दैआएको समेत जानकारी दिनुभयो ।
उहाँले दाना उद्योगमा पानीको प्रयोग नहुने भएकाले प्रदूषण नभएको र केही मेसिन चल्दाको अवस्थाको प्रदूषण नियन्त्रण गर्ने उपकरणको प्रयोग गरेको प्रतिकृया दिनुभयो । उता जमुवा क्षेत्रका केही स्थानीयहरुले उद्योगको कारणले डुबान र प्रदूषण बढेको गुनासो गर्दै उद्योगविरुद्ध आन्दोलनको चेतावनी दिएका छन् ।
– जयकृष्ण यादव
