नवलपुर, भदौ १३ : नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले राज्यबाट पछाडि पारिएका समुदायलाई राजनीतिको मूलधारमा ल्याउन संविधान संसोधन गरेर विशेष क्षेत्र र संरक्षित क्षेत्र बनाउनुपर्ने बताउनु भएको छ ।
थारु समुदायको परम्परागत भोदी खेल उद्घाटन गर्न नवलपुरको कावासोती–१६ डण्डा आउनु भएका प्रचण्डले थारु लगायत अन्य जनजाति र पछाडि पारिएका समुदायका लागि विशेष र संरक्षित क्षेत्र बनाएर उनीहरुलाई राजनीतिको मूलधारमा ल्याउनुपर्ने बताउनुभयो ।
‘‘गण्डकी प्रदेशको नवलपुरमा मात्र थारु समुदायको सघन बसोबास छ र झण्डै ४५ हजार थारु यहाँ रहेका छन्, तर अहिलेको निर्वाचन प्रणालीअनुसार कुनै पनि थारु चुनाव जितेर आउन सक्ने अवस्था छैन, झण्डै असम्भव जस्तै छ’’ प्रचण्डले भन्नुभयो, ‘‘गैँडाकोटदेखि विनयी त्रिवेणीसम्म नारायणी नदी किनारमा बसोवास गर्ने थारुहरुको क्लस्टर पनि मिलेकाले स्वायत्त वा संरसिक्षत क्षेत्र बनाउनुपर्छ ।’’
प्रमुख प्रतिपक्षी दलका नेता समेत रहेका प्रचण्डले डण्डामा रहेको थारु संग्रहालयको झण्डै ७ विघा क्षेत्रफलको भोगाधिकार प्राप्त नभएकाले भोगाधिकार दिलाउन प्रयास गर्ने बताउनुभयो । साथै उहाँले संग्रहालयमा भौतिक संरचना निर्माणका लागि पनि बजेट विनियोजन गर्न सरकारसँग पहल गर्ने आश्वासन दिनुभयो ।
उहाँले कावासोतीमा निर्माणधीन नमुना सदरमुकाम र कावासोती –८ मा रहेको टरुवा तालको पनि अवलोकन गर्नुभएको थियो । नमुना सदरमुकामको अवलोकन गर्दै प्रचण्डले कामको सुरुवात राम्रो भएको भन्दै निर्धारित समयमै निर्माण सम्पन्न गर्न सबै पक्षले निर्माण कम्पनीलाई आवश्यक सहयोगका साथै दबाब दिनुपर्ने बताउनुभयो ।
