१८ साउन, गाजा : गाजामा युद्धविरामका लागि इजरायलले राखेको निशस्त्रीकरणको माग हमासले अस्वीकार गरेको छ । सार्वभौम प्यालेस्टीनी राज्य स्थापना नभएसम्मका लागि आफूहरु हतियार बिसाउन तयार नहुने हमासको भनाइ छ ।
हालै अमेरिकी राष्ट्रपति डोनाल्ड ट्रम्पका मध्येपूर्व दूत स्टिभ विटकफले हमासले हतियार बिसाउन इच्छा देखाएको भनेर गरेको टिप्पणीको प्रतिक्रियामा आतंकवादी संगठन हमासले इजरायलको यस्तो शर्त मान्न नसकिने बताएको हो ।
इजरायलले गाजामा युद्ध अन्त्यका लागि हमासको निशस्त्रीकरणलाई प्रमुख शर्तका रुपमा अगाडि सारेको छ । इजरायल र हमासबीच युद्धविराम र बन्धकको रिहाइबारे चलिरहेको अप्रत्यक्ष वार्ता पनि गत साता अवरुद्ध भएको थियो ।
फ्रान्स र क्यानडासहित कतिपय पश्चिमा देशहरूले प्यालेस्टाइन राज्यलाई मान्यता दिने योजना सार्वजनिक गरेपछि केही दिन यता अरब सरकारहरूले हमासलाई हतियार त्याग्न अनि गाजाको नियन्त्रण छाड्न आग्रह गरिरहेका छन् । यूकेले भने सेप्टेम्बरसम्म इजरायलले उसका केही शर्त नमाने त्यसो गर्ने भनेको छ ।
आतंकवादी संगठन हमासले एक विज्ञप्ति जारी गर्दै भनेको छ, ‘जेरुसलेम राजधानीसहितको स्वतन्त्र, तथा पूर्ण सार्वभौम प्यालेस्टीनी राज्य स्थापना नभएसम्म हाम्रो ‘विद्रोह तथा हतियार’का अधिकार त्याग्न सकिँदैन ।’
यता इजरायल डिफेन्स फोर्सका प्रमुख इयाल जमिरले हमासले बन्धक राखेकाहरुलाई छिट्टै रिहा नगरे गाजामा युद्ध थप चर्किने चेतावनी दिएका छन् । यस्तै हमासले शनिबार एक बन्धकको भिडियो सार्वजनिक गरेको छ । एम्यातार डेभिड नामका बन्धकको भिडियो सार्वजनिक भएपछि उनको परिवारले सुरुङमा राम्रोसँग खाना समेत नदिएको र यातना दिएको आरोप लगाएको छ ।
अँध्यारो सुरुङमा कमजोर र माथिल्लो जीउमा लुगा नलगाएका अवस्थामा रहेका उनको भिडिओ हमासले सार्वजनिक गरेपछि परिवारले एक विज्ञप्ति जारी गर्दै उद्धारका लागि सरकारसँग अनुरोध गरेका छन् ।
परिवारले उनलाई भोकै राखिएको तथा प्रोपागान्डाका लागि प्रयोग गरेको आरोप हमासलाई लगाएको छ । साथै परिवारले इजरायली सरकार र अमेरिकालाई उनको जीवनरक्षाका लागि हरसम्भव उपाय गर्न अपिल गरेको छ ।
