९ असार, नवलपरासी : एक सातादेखि अवरुद्ध दाउन्ने सडक खण्डमा गाडीको चाप बढ्न नदिन सोमबार प्रहरीले ६० किलोमिटर पर गैंडाकोटमा मालबाहक ट्रकहरु रोकिदिएको छ ।
प्रहरी उपरीक्षक यादव ढकालले दाउन्नेमा गाडीको चाप नहोस भनेर दाउन्ने देखि ६० किलोमिटर पूर्व गैंडाकोट र हर्कपुरमा ट्रक रोकिदिएको जानकारी दिए । नारायणगढबाट बुटवलतर्फ जाने ट्रक गैंडाकोट क्षेत्रमा रोकिएका छन् । बुटवलबाट नारायणगढ आउने सबै ट्रक बर्दघाटमा रोकिएका छन् ।
सडक आयोजना पूर्वी खण्डकी प्रमुख अनुच्छा घिमिरेले दाउन्नेमा ५ सय टिपर ग्राभेल राखेर यातायात सुचारु गराउनका लागि दाउन्नेमा लामा गाडी र ट्रक जान नदिएको जानकारी दिइन् । घिमिरेले दाउन्नेमा सोमबार बिहानसम्म ५० टिपर ग्राइभेल राखेको जानकारी दिइन् । दुम्कीवासदेखि पश्चिम दाउन्नेको कान्तिपुर होटलसम्मको करिब ७ किलोमिटर दाउन्ने सडकमा ५ सय टिप्पर ग्राइभेल राख्ने काम सुरु भएको छ । अब तिनदिन भित्र दाउन्ने सडक खण्ड सुचारु हुने अनुमान गरिएको घिमिरेले जानकारी दिएन् ।
गत पुस २६ गते दुम्कीवासस्थित बिनयी खोलाको फलामे पुल भाँच्चिएपछि त्यही पुलको उत्तर तर्फबाट डाइभर्सन निर्माण गरेर आउजाउ गराइँदै आएको छ । सडक डिभिजन कार्यालय भरतपुरका अनुसार आइतबारसम्म यो डाइभर्सन ९ पटक बगाउँदा ५७ लाख खर्च भैसकेको छ ।
असार ३१ गतेबाट नयाँ पुल सञ्चालन
दुम्कीवासमा निर्माण गरिएको नयाँ पक्की पुलमा असार ३१ गतेबाट सञ्चालन हुने भएको छ । सडक आयोजना पूर्वी खण्डकी प्रमुख अनुच्छा घिमिरेले चिनियाँ ठेकेदारले असार ३१ गते नवनिर्मित पुलबाट गाडी चलाउन मिल्ने भनेर आफूलाई पत्राचार गरेको जानकारी दिइन् । त्यो पुलबाट सवारी सञ्चालन नहुँदासम्म डाइभर्सनकै भर पर्नुपर्ने उनको भनाइ छ ।
