काठमाडौँ, २४ पुस : प्रणय दिवसको छेको पारेर फागुन २ देखि प्रदर्शनमा आउन लागेको फिल्म ‘दुखी आत्मा’को टिजर मंगलबार सार्वजनिक गरिएको छ ।
दीपेन्द्र लामाको लेखन तथा निर्देशन रहेको फिल्मको टिजर मूलतः द्वीअर्थी संवादमा केन्द्रित छ । कविको भूमिकामा रहेका दयाहाङ राई फिल्ममा आँचल शर्मासँगको प्रेममा लीन देखिन्छन् ।
निर्माणपक्षले फिल्म एडल्ट विषयवस्तुमा तयार रहेको बताएको छ । हिमाल कडरियाको लगानी रहेको फिल्ममा आलोक शुक्लाको छायांकन, निमेष श्रेष्ठको सम्पादन रहेको छ ।
फिल्ममा अनुपविक्रम शाही, बुद्धि तामाङ, रेअर राई, पुष्कर गुरुङ, कविता आले, लोकेन्द्र लेखक, आरती आचार्य, आशान्त शर्मा, दिया मास्के, लुनिभा तुलाधर, शिशिर वाङ्देल लगायतका कलाकारहरूको अभिनय छ । यस पटक, दयाहाङले आफ्नो काम गर्ने कथावस्तुको शैली फेरेका छन् । उनी फिल्ममा रोमान्टिक साथै पीडित पनि देखिएका छन् । उनको पीडाको भाव टिजरले खुलाएको छैन ।
