काठमाडौँ, असोज १ : जेन-जी आन्दोलनको प्रभावका कारण पर्यटकीय गतिविधिमा कमी आएको छ । पर्यटकीय यामको मुखमा भएको परिवर्तनकारी आन्दोलनका कारण पर्यटकको आगमनमा असर परेपछि तत्काल उड्डयन र होटेल क्षेत्रमा प्रभाव देखिएको हो । पर्यटकीय गतिविधि न्यून भएपछि हङकङको क्याथे प्यासिफिक एयरवेजले नेपाल उडान रोकेको छ ।
नेपाल नागरिक उड्डयन प्राधिकरणका सूचना अधिकारी ज्ञानेन्द्र भुलले भन्नुभयो, “हङकङ–नेपाल रुटमा उडान गर्दै आएको क्याथे प्यासेफिकले अजोज १४ सम्मलाई उडान रोकेको छ । यो कम्पनीले २८० सिट क्षमताको वाइडबडी जहाजमार्फत दैनिक काठमाडौँमा उडान गर्दै आएको थियो ।”
हाल हङकङमा नेपाल वायुसेवा निगमले सातामा चार दिन उडान गर्दै आएको छ । क्याथेको उडानमार्फत यात्रु हङकङ हुँदै अमेरिका, क्यानडा, युरोप, अस्ट्रेलिया, जापानलगायत गन्तव्यमा जाने गरेका थिए ।
होटेल सङ्घ नेपालका अध्यक्ष विनायक शाहले पछिल्ला राजनीतिक घटनाक्रमको असरले होटेल क्षेत्रमा प्रत्यक्ष असर पुगेको बताउनुभयो । उहाँले भन्नुभयो, “भूकम्प, नाकाबन्दी र कोरोना महामारीपछि तङ्ग्रिएको पर्यटन क्षेत्रमा प्रदर्शनको असर देखिन सुरु भइसकेको छ । बढी विदेशी पर्यटक आउने असोज–कात्तिकको समयमा होटेल बुकिङ गरिसकेका पर्यटक आउन डराइरहेका छन् भने केहीले बुकिङसमेत रद्द गरेको सुन्नमा आएको छ ।”
अर्थतन्त्रको मेरुदण्डका रूपमा रहेको पर्यटन क्षेत्रमा थप असर हुन नदिन सरकार र निजी क्षेत्र मिलेर जति सक्दो चाँडो नेपाल सुरक्षित छ भन्ने सन्देश दिन आवश्यक रहेको उहाँले बताउनुभयो ।
दैनिक जनजीवन समान्यतर्फ फर्किए पनि होटेललगायतका पर्यटकीय पूर्वाधारमा भएको आगजनी, तोडफोडका कारण दसैँतिहार जस्ता पर्वको मुखैमा पर्यटन क्षेत्रमा आश्रित देशभरका दुई हजारभन्दा बढी कामदार, कर्मचारी प्रभावित हुन सक्ने उहाँले बताउनुभयो ।
आन्दोलनका क्रममा स्वदेशी तथा विदेशी ब्रान्डका होटेलमा क्षति पुगेको र केही होटेल मर्मतसम्भार तथा पुनर्निर्माण नगरी सञ्चालनमा आउन नसक्ने अवस्थामा रहेको उहाँको भनाइ छ ।
