काठमाडौँ, भदौ १५ : नेपालमै पहिलो पटक गजल, सङ्गीत र ललितकला उत्सव सम्पन्न भएको छ । गजलको विकास, विस्तार र परिष्कारमा सक्रिय संस्थाहरू अनाममण्डली र अन्तर्राष्ट्रिय नेपाली गजल मञ्च तथा क्रियाशील गोल्डेन क्रियसनको आयोजनामा उक्त उत्सव भएको हो । उत्सवमा नेपाल प्रज्ञा–प्रतिष्ठान, नेपाल सङ्गीत तथा नाट्य प्रज्ञा–प्रतिष्ठान र नेपाल ललितकला प्रज्ञा–प्रतिष्ठानले सहकार्य गरेको थियो ।
उत्सवमा सात वटै प्रदेशका स्रष्टाको राष्ट्रिय भावमा लेखिएका गजललाई विश्व कीर्तिमानी सङ्गीतकार सन्तोष श्रेष्ठले आफ्नै सङ्गीत र स्वरमा प्रस्तुत गर्नुभएको थियो । सुदूरपश्चिम प्रदेशबाट भुवन निस्तेज, कर्णालीबाट कुशलनाथ योगी, लुम्बिनीबाट सन्तोष श्रेष्ठ, गण्डकीबाट देवेन्द्र केसी ‘देवु’, बागमतीबाट राधा कणेल, मधेशबाट विवश पौडेल र कोशीबाट रश्मि असफलका तथा आयोजक संस्था अनाममण्डलीका अध्यक्ष रूपक अलङ्कार र अन्तर्राष्ट्रिय नेपाली गजल मञ्चका अध्यक्ष घनेन्द्र ओझाका गजल प्रस्तुत गरिएका थिए ।
गाइएका गजलमा नेपाल ललितकला प्रज्ञा–प्रतिष्ठानका कुलपति नारदमणि हार्तम्छाली, उपकुलपति लालकाजी लामा, सदस्य सचिव देवेन्द्रकुमार काफ्ले ‘थुम्केली’ तथा प्राज्ञ परिषद् सदस्यहरू अरुणा हिङमाङ्ग, सौरगङ्गा दर्शनधारी, सञ्जय वान्तवा, प्रदीप अधिकारी (सुशान्त), दिनेश्वर महतो र पाल्साङ्मो लामाले चित्र बनाउनुभएको थियो ।
कार्यक्रम संयोजक तथा अन्तर्राष्ट्रिय नेपाली गजल मञ्चका अध्यक्ष घनेन्द्र ओझाले नेपाली वाङ्मयका तीन विधा गजल सङ्गीत र साहित्यलाई एकै थलोमा प्रस्तुत गरिएको र त्यसमाथि राष्ट्रिय भावका गजलको गायन नेपालमै पहिलो भएको जानकारी दिनुभयो ।
नेपाल सङ्गीत तथा नाट्य प्रज्ञा–प्रतिष्ठानका सदस्यसचिव कुस्मा महरा (प्रगति) ले यस्तो ऐतिहासिक कार्यक्रममा सहकार्य गर्न पाउँदा प्रतिष्ठानले गर्व अनुभव गरेको बताउनुभयो । नेपाल प्रज्ञा–प्रतिष्ठानका कुलपति भूपाल राईले सबै भूगोल समेटेर प्रतिनिधि रूपमा गजलकार छनोट गरी साहित्य, सङ्गीत र ललितकलालाई एकै थलोमा प्रस्तुत गर्ने काम महत्वपूर्ण रहेको र त्यसमा प्रतिष्ठानसमेत जोडिन पाउँदा खुसी लागेको बताउनुभयो ।
नेपाल ललितकला प्रज्ञा–प्रतिष्ठानका कुलपति नारदमणि हार्तम्छालीले कार्यक्रम सौहार्द, भव्य र सफल भएको भन्दै गजल, सङ्गीत र ललितकलाको अभूतपूर्व सङ्गमको साक्षी हुन पाएकोमा हर्ष व्यक्त गर्नुभयो । उहाँले यस्ता कार्यक्रमले नेपाली वाङ्मयको विकासमा अर्थपूर्ण योगदान दिने बताउनुभयो ।
