कीर्तिपुर (काठमाडौँ), ११ जेठः आराध्य रञ्जितकार कलम, कागज वा क्यालकुलेटरबिना मनमनै हिसाब गर्ने गणितीय कला (युसिमास) प्रतियोगिताको ‘च्याम्पियन अफ दी च्याम्पियन’ घोषित भएका छन् ।
आज यहाँ सम्पन्न उक्त प्रतियोगितामा सहभागी देशभरका रब ५०० विद्यार्थीबीचको प्रतिस्पर्धाबाट उनले सो उपाधि पाएका हुन् । बाह्र वर्षीय रञ्जितकार काठमाडौँकै काजिरोवा स्कुलमा कक्षा ७ मा अध्ययनरत छन् ।
विश्वव्यापी रूपमा मान्यता प्राप्त युसिमास कार्यक्रमअन्तर्गत तालिम प्राप्त बालबालिकाहरूको अद्वितीय मानसिक गणित क्षमतालाई कार्यक्रममा प्रस्तुत गरिएको थियो । कार्यक्रममा युसिमास अन्तरराष्ट्रिय मुख्यालय मलेसियाका प्रमुख अलेक्सन वोंगले विद्यार्थीहरूको उत्कृष्ट प्रदर्शनको प्रशंसा गर्दै बालबालिकाको संज्ञानात्मक विकासमा युसिमास कार्यक्रमको महत्वपूर्ण भूमिका रहेको उल्लेख गरे ।
प्रतियोगितापछि आयोजित कार्यक्रममा विजयी विद्यार्थीहरूलाई ट्रफी, पदक र प्रमाणपत्र प्रदान गरियो । कार्यक्रममा सबै सहभागीहरूलाई सम्मान गरिनाका साथै उत्कृष्ट प्रदर्शन गर्ने विद्यार्थीहरूलाई नगद पुरस्कार प्रदान गरिएको थियो ।
