काठमाडौँ, १५ माघः लोकप्रिय भारतीय गायक सोनू निगमले हालै आफ्नो इन्स्टाग्राममा एक भिडियो सेयर गरे । भिडियोमा उनले पद्म अवार्डको विषयमा असन्तुष्ट व्यक्त गरेका छन् । उनले केही गायकहरूको नाम लिँदै उनीहरूलाई उचित सम्मान नदिइएकोमा दु:ख व्यक्त गरे ।
सोनू निगमले भिडियोमा भनेका छन्, ‘भारतीय संगीत र मनोरन्जन क्षेत्रमा योगदान पुर्याएका गायकहरूको योगदान अमूल्य छ । तर, मोहम्मद रफी र किशोर कुमारजस्ता महान गायकहरूलाई अहिलेसम्म पद्म पुरस्कार प्राप्त भएन ।’
सोनू निगमले अलका याग्निक, श्रेया घोषाल र सुनिधि चौहान पनि सम्मानको हकदार भएको बताएका छन् । उनीहरूलाई अहिलेसम्म पद्म पुरस्कार नदिइएकोमा उनले दुःख व्यक्त गरे ।
सोनु निगम केही साताअघि मात्र नेपालमा आफ्नो सानदार प्रस्तुति दिएर फर्किएका थिए । उनले केही नेपाली गीत पनि गाएका छन् । उनका नेपाली गीतमध्ये ‘उकाली ओराली गर्दै’ र ‘यो जिन्दगीले…’ चर्चित छन् ।
