काठमाडौँ, १० माघ : चर्चित दक्षिण भारतीय फिल्म ‘डाँकु महाराज’ शुक्रबारदेखि नेपाली हलमा पनि रिलिज हुने भएको छ । १२ जनवरीमा भारतमा तेलुगु संस्करणमा रिलिज भएको यो फिल्म हिन्दी भाषामा नेपाली हलमा पनि आउन लागेको हो ।
फिल्ममा ६४ वर्षीय नन्दमुरी बालकृष्ण, बबी देओल र उर्वशी रौतेलाले मुख्य भूमिका निर्वाह गरेका छन् । यो फिल्मले तेलुगु संस्करणमा मात्र ८१.२४ करोड नेट भारु कमाएको भारतीय संचारमाध्यमले जनाएका छन् ।
नन्दमुरी बालकृष्णको शीर्ष भूमिका रहेको यो फिल्मलाई मास इन्टरटेनर बताइएको छ । हिन्दी रिलिजबारे उनले भने, ‘फ्यानहरूको माया र प्रतिक्रिया साँच्चै राम्रो छ । डाँकु महाराज मेरो मुटुको एकदमै नजिक रहेको फिल्म हो । भारतका हिन्दी दर्शकमाझ रिलिज हनु लागेकोमा म उत्साहित छु ।’
फिल्ममा अभिनेत्री रौतेलाको शीर्ष भूमिका छ । फिल्मबारे उनले भनिन्, ‘डाँकु महाराजमा काम गर्नु अविस्मरणीय यात्रा रह्यो । फिल्ममा धेरै एक्सन, ड्रामा र इमोसन समावेश छ । म विश्वस्त छु कि यसलाई हिन्दी दर्शकले पनि दक्षिण भारतका दर्शकले जस्तै स्वीकार गर्नेछन् । यो फिल्मको हिस्सा बन्न पाउनु मेरो लागि सम्मानको कुरा हो ।’
नेपालमा यो फिल्मलाई ब्यांकटेस इन्टरटेनमेन्टले देशब्यापी प्रदर्शन गर्न लागेको हो ।
