प्रकाश सपुत निर्देशित फिल्म ‘वसन्त’को पहिलो गीत सार्वजनिक भएको छ । शनिबार आयोजित पत्रकार सम्मेलनमा ‘साँझ पर्यो झमक्क’ बोलको गीत सार्वजनिक गरियो ।
गीतको अडियोमा शब्द, संगीत र सपुतको छ । गायनमा उनले शान्तिश्री परियारसँग सहकार्य गरेका छन् । सुदीप सागरले संगीत संयोजन गरेका हुन् ।
गीतको भिडियोमा सपुत र स्वस्तिमा खड्काले अभिनय गरेका छन् । सहायक कलाकारहरू प्रभातपाल ठकुरी, खड्गबहादुर पुन, शिभांशी श्री लगायतलाई देखाइएको छ ।
यो गीतले फिल्मका दुई पात्र वसन्त र शान्तीको प्रेमलाई दर्शाएको छ । मौसम हिमालीको नृत्य निर्देशन यसमा छ । आयोजित पत्रकार सम्मेलनमा सपुतसहितका कलाकारले फिल्मबारे जानकारी दिए ।
सपुतकै होमप्रोडक्सन गलबन्दी प्रोडक्सनले फिल्म निर्माण गरेको हो । निर्मातामा मोहन विश्वकर्मा र बिन्दु बोहोरा छन् । कार्यकारी निर्मातामा वीरेन्द्रनारायण श्रेष्ठ, अनुरोध भट्टराई र नाना थकाली छन् । यो फिल्म २२ चैत, २०८१ (४ अप्रिल, २०२५)मा प्रदर्शनमा आउने जनाइएको छ ।
