कांग्रेसले अब पाँच वर्षको समय खेर फाल्दैन : सभापति थापा

काठमाडौँ, फाल्गुन ६ : कांग्रेस सभापति गगन थापाले अबको पाँच वर्षको समय खेर नफाल्ने बताएका छन् । उनले सबै राजनीतिक दल र पक्षलाई सम्हालेर कांग्रेसले अबको पाँच वर्ष विकास र परिवर्तनको नेतृत्व लिने बताए ।

‘कांग्रेसले अब पाँच वर्षको समय खेर फाल्दैन । कांग्रेसले हिजोको दिनको गौरव गर्छ । तर, हिजोमा अड्किएर बस्दैन । आजको समस्या समाधान गर्छ, भोलिको उज्यालो दिनको नेतृत्व गर्छ,’ उनले जनकपुरको प्रतिज्ञा सभालाई सम्बोधन गर्दै भने, ‘कांग्रेसको शक्ति घृणा होइन । प्रेम हो । कांग्रेसको शक्ति निषेध होइन, सबैलाई सहभागी गराउने शक्ति हो । त्यसैले यो पार्टीले सम्हालेर, सबैलाई समेटेर, सिंहदबार जल्न नदिएर, कसैलाई गोली नहानेर यो देशको नेतृत्व गर्नेछ ।’

थापाले पहिलाजस्तो घोषणामात्रै नगरी यसपटक गर्न सकिने विषयलाई मात्रै कांग्रेसले प्रतिज्ञापत्र ल्याएको बताए ।

‘म जे बोल्छु, यो प्रतिज्ञामा लेखिएको अक्षरशः पालना गर्छु । मैले मात्रै होइन, पार्टीका एउटा सदस्यहरुले पनि अबको पाँच वर्ष यसको पालना गर्नेछ । जस्तोसुकै असहज स्थितिमा पनि सरकार भएपनि, प्रतीपक्षमा भएपनि, महलमा भएपनि, सडकमा भएपनि, परिवर्तनका यी दसवटा बुँदाहरु पूरा गर्ने लक्ष्यमा काम गर्नेछ,’ थापाले भने ।

प्रत्येक नेपालीले पेटभरि खुवाउने, आफ्नो उत्पादनलाई संसारमा चिनाउने, ओखती गर्दै गर्दा डराउन नपर्ने, नेपाललाई मौलिकतामा गौरव गर्ने, आधुनिकतामा लम्किने नेपाल बनाउने आफूले अठोट लिएको उनले बताए ।

‘यो देशलाई विश्वले स्वभामिवानी देश भनेर चिन्ने देश बनाउने छौँ । नेपाललाई समुन्नतिलाई लम्काउने, प्रत्येक नागरिकलाई हैरानीबाट मुक्त बनाउने नेपाल बनाउने छौँ । पाँच वर्षको काम गर्दा दस वर्ष लाग्ला । पाँच वर्षमा नसकिएला । तर, कांग्रेसका प्रत्येक पाइलाहरु यो प्रतिज्ञाको लक्ष्य भेट्टाउन लाग्नेछ,’ उनले भने ।

बोल्नुअघि थापाले ‘भिजन टेन‘ अन्तर्गतको संक्षिप्त प्रतिज्ञात्रपत्र सार्वजनिक गरेका थिए । ‘राज्यको प्रश्न गर्दा राज्यको गोलीबाट कुनै पनि युवा अब मारिँदैन । कसैले नकाबाट सिंहदरबार जलाउन पाउँदैन । तन्नेरीको भावनलाई सम्पूर्ण ग्रहण गर्छौं । जेन-जी भनेको कहीँबाट आएको होइन । हाम्रौ घरबाट आएका हुन् । तीनले प्रश्न गरेका हुन् । ती सबैको उत्तर लिएर आएका छौं,’ थापाले भने,

‘अबदेखि मलखाँदका लागि लाइन बस्न पर्दैन । लाइसेन्स लिन जाँदा घुस दिन पर्दैन । हातमा फाइल बोकेर काठमाडौंको अदालतमा घन्टौं धाउन पर्दैन । कसरी गर्ने, के कारणले गर्दा भएन । कसरी गर्ने सबै कुराको खोजी गरेर आएका छौँ । हिजो धेरै काम भए । केही थुप्रै काम सुधार गर्ने संकल्प र योजना बोकेर आएका छौँ । २७ वटा विषयमा एउटा– एउटा कुरा लेखेका छौं । यो लेख्नका लागि लेखेको होइन,’ उनले भने, ‘त्यसैले यो पटक घोषणा गर्दैनौँ, प्रतिज्ञा गर्छौं भनेर प्रतिज्ञापत्र भनेका छौँ ।’

उनले २७ वटा विषयमा शिक्षा, स्वास्थ्य, कृषि, युवा, महिला, दलित, मधेशीलगायत सबै क्षेत्रमा कसरी परिणाम ल्याउन सकिन्छ भनेर लामो समयदेखि अध्ययन गरेर प्रतिज्ञापत्र ल्याइएको बताए ।

‘तँ चोर, म असल, जादुको छडीले हानेजस्तो एकैछिनमा ठिक लगाउँछु भनेर म भन्दिनँ । समस्या छ, समस्यको जरा कहाँ छ ? कुन ठाउँमा गएर ठिक बनायो भने परिणाम ठिक आउँछ । हामीलाई विकास र प्रगति चाहिएको छ, त्यसको सबै अध्ययन गरेर समस्या पहिचान गरेर के गर्दा गर्न सकिन्छ भनेर पत्ता लगाएर यो प्रतिज्ञा गरिएको छ,’ थापाले भने, ‘प्रत्येक भाषा, धर्म, संस्कृतिलाई आफ्नो ठाउँ चाहिएको छ । त्यसलाई खोसेर होइन, अझै फराकिलो बनाएर परम्परागत मान्यतालाई जोगएर सबैलाई जातजाति, अल्पसंख्यकलाई लिएर सँगसँगै लिएर अधिकार संरक्षण गरेर विकासको ठाउँमा पुग्ने हो ।’

दुई ठूला छिमेकी देशका बीचमा मुलुकलाई सम्हालेर लैजानुपर्ने नेतृत्व चाहिएको भन्दै थापाले टिम नेपालको भावनामा कांग्रेसले काम गर्ने बताए । ‘नेपाललाई स्कटल्याण्डलाई क्रिकेटमा हरायो । खेल मैदानमा खेलाडी थिए । खेलेको टिम नेपालले खेलेको हो । टिम यसरी नै बन्छ । कुनै भ्रम छैन, देश पनि एउटा दलले बनाउन सक्दैन । चटक जस्तो गरेर देश बन्दैन,’ उनले भने, ‘कांग्रेसले प्रदेश, स्थानीय तह सबैलाई मिलाएर लैजान्छ । सबै राजनीतिक दललाई नेतृत्व लिएर देश बदल्ने जिम्मा लिन्छ । देशभित्र रहेको र बाहिर रहेका नागरिकलाई जोड्छ । सबैलाई जोडेर टिम नेपालले पाँच वर्ष लड्छ । टिम लडछ्, नेपालको कुशासनलाई हराउँछ । नेपालको गरिबीलाई हराउँछ । नेपालको बेरोजगारीलाई हराउँछ ।’