महोत्तरी, असोज २० : महोत्तरीको सदरमुकाम जलेश्वरमा आएको बाढीको कारण दर्जनभन्दा बढी कार्यालयमा पानी पसेको छ । बाढीको कारण तीन दिनदेखि जलेश्वर क्षेत्रमा बिजुलीसमेत अवरुद्ध छ । सदरमुकाम जलेश्वर जोड्ने सडक अवरुद्ध छ ।
लगातारको वर्षाको कारण जलेश्वरमा बाढी आउँदा जलेश्वर नगरपालिका सहित प्रादेशिक अस्पताल जलेश्वर, विद्युत प्राधिकरण जलेश्वर शाखा तथा सबस्टेशन, नेपाल टेलिकम, लोकसेवा आयोग, जिल्ला प्रशासन कार्यालय, जिल्ला अदालतका कार्यालयहरुमा पानी पसेको छ ।
विद्युत् सबस्टेशनमा बाढीको पानी पसेको कारणले तीन दिनदेखि जलेश्वर क्षेत्रमा विद्युत् अवरुद्ध छ । जलेश्वरका युवा दीपेन्द्र चौधरीले शनिबार दिनभरी काटिएको बिजुली आइतबार दुई घण्टाको लागि आए पनि पुनः सबस्टेशनमा बाढीको पानी पसेपछि अवरुद्ध भएको बताउनुभयो ।
लगातारको अविरल वर्षाको कारण महोत्तरीको विभिन्न क्षेत्रमा बाढी र डुबान भए पनि आइतबार रातिदेखि पानी पर्ने क्रम रोकिएको छ । डुबान विस्तारै कम हुन थालेको छ । शनिबारदेखि लगातार परिरहेको पानीको कारणले महोत्तरीका नदीहरुमा जलस्तर बढ्नुका साथै विभिन्न ठाउँका तटबन्धहरु कटान गरेपछि बाढी जलेश्वरको बस्तीमा प्रवेश गरेको थियो ।
लगातारको पानीको कारणले जिल्लामा रहेको रातो, जंग्हा, माढा, विग्ही, गेरुकी, कुटमेश्वरी लगायतका दर्जनभन्दा नदीमा जलस्तर बढेपछि रातो नदीको रतवारमा २० मिटर बाँध कटान भएको छ । त्यसैगरी एकडारा, बलवा तथा जलेश्वर नगरपालिका ३ को धवौलीमा सशस्त्र प्रहरी चेकपोष्टभन्दा दक्षिणमा ३५ मिटर बाँध कटान गरेपछि जलेश्वरमा बाढी आएको चौधरीले बताउनुभयो ।
रतवाराको तटबन्ध कटानले पानी सोझै सदरमुकाम जलेश्वर प्रवेश गरेको थियो । जसका कारण जलेश्वरको महादेव मन्दिर क्षेत्र, जलेश्वरको अस्पताल चोक, जिरोमाइल चोक, बसस्टेण्डचोक डुबानमा परेको छ ।
बाढीको कारणले जिल्लाको सदरमुकाम जलेश्वरसँग धेरै पालिकाको सडक अवरुद्ध भएको छ । बाढीको कारण जलेश्वर बर्दिबास, जलेश्वर जनकपुर, जलेश्वर मटिहानी लगायतका क्षेत्रको सडक अवरुद्ध छ ।
मटिहानी नगरपालिकाका नगरप्रमुख हरिप्रसाद मण्डलले सुगा गाउँभन्दा पूर्व रहेको लचका भएर दुई फिटभन्दा बढी पानी बगिरहेकाले जलेश्वर मटिहानी आउन पैदल यात्रीहरुलाई समस्या भइरहेको बताउनुभयो । पानी घट्ने क्रममा रहेकाले सडक चाँडै सञ्चालनमा आउने बताउनुभयो ।
– नागेन्द्रकुमार कर्ण
