धनगढी, भदौ १८ : कैलालीको गोदावरी नगरपालिका–९, भल्कास्थित खुटिया नदीमा बिहीबार एकै घरका दुई दाजुभाइसहित चार किशोर डुबेर बेपत्ता हुनुभयो । घटना भएको आसपास अन्यत्र गहिराइ नरहेको सो नदीमा करिब २० मिटर भाग मात्रै गहिरो छ । त्यसमा किशोरहरू डुबेपछि दगुरेर उद्धारका लागि पुगेका सर्वसाधारणले गहिरोमा गएर खोज्न आँट गर्नै सकेनन् ।
स्थानीयका अनुसार घटना भएको ठाउँमा एक्कासि गहिरो छ, करिब २० फिट । जहाँ एक सिङ्गो बाँस डुब्छ । जसका कारण पौडीबाज स्थानीयसमेत गहिरोमा जान डराए । नदीको गहिराइमा नदी किनारकै पौडीबाज स्थानीय, माछा मार्ने मछुवारसमेत जान डराएपछि डुबेका किशोर खोज्ने र शव निकाल्ने काम सशस्त्र प्रहरी बलको गोताखोर टिमले ग¥यो ।
सशस्त्रको यो टिमले आफ्नो ज्यानको बाजी लगाएर नदीमा डुबेकाको खोज, उद्धार गर्दै आएको छ । चितवनको कुरिनटारमा तालिमपश्चात् आफ्नो टिमले यो प्रदेशमा खोज, उद्धारको काम गरिरहेको गोताखोर जवान योगेन्द्र कार्कीले बताउनुभयो । उहाँले सेती, कर्णाली, महाकाली नदीमा डुबेर बेपत्ता भएका व्यक्तिको खोजीकार्य गरिसकेको उल्लेख गर्नुभयो । “यसअघि पनि हामीले खोजेर पाँच/छ वटा शव निकालिसकेका छौँ,” कार्कीले भन्नुभयो, “हराएका व्यक्तिको लास भए पनि खोजेर आफन्तलाई बुझाउन पाउँदा आफ्नो कामप्रति गर्व लाग्छ ।”
पानीभित्र पसेर कसैले खोजी गर्न नसकेको अवस्थामा सबैको अन्तिम आशा, भरोसा गोताखोर टिम बन्ने गरेको छ तर अक्सिजन सिलिन्डर पिठिउँमा बोकेर पानीमा डुबुल्की लगाउने गोताखोरलाई यो काम गर्न सजिलो भने पटक्कै छैन । डुब्ने बेलामै गाह्रो हुने गरेको जनाउँदै जवान कार्कीले चुनौतीलाई पन्छाएर काम गर्ने गरेको अनुभव सुनाउनुभयो ।
“कठिनाइ नहुने त कुरै भएन । पानीमा डुबेपछि गाह्रो भइहाल्छ,” उहाँले भन्नुभयो, “तर यो गर्दै आएको काम हो । हाम्रो दायित्व हो । गाह्रोको सामना गर्न नै गोताखोर तालिम लिएका हौँ ।”
वडाध्यक्ष रामलाल रानाका अनुसार किशोरहरू डुबेको ठाउँमा सामान्य मान्छेले डुबेर बालुवासमेत छुन सक्दैनन् । “हाम्रो गाउँका पौडीबाजलेसमेत भित्र जमिन छुन सकेनन्,” उहाँले भन्नुभयो, “तपाइ, हामी जस्ता सामान्य मान्छेका लागि त्यो ठाउँ खतरनाक छ ।”
त्यस स्थानमा डुबेर धनगढी उपमहानगरपालिका–४, उत्तरबेहडीका जुम्ल्याहा दाजुभाइ १७ वर्षीय जेफ भण्डारी, याबेस भण्डारी, धनगढी उपमहानगरपालिका–५, तारानगरका १७ वर्षीय सक्षम जोशी र जाइका १५ वर्षीय प्रतीक चौधरीको ज्यान गएको थियो । डुबेका किशोरको खोजी गरेर कार्कीसहितका सशस्त्र प्रहरीको गोताखोर टिमले शव निकालेको थियो ।
सशस्त्र प्रहरी वैद्यनाथ बाहिनी मुख्यालयका सूचना अधिकारी वीरेन्द्रबहादुर ऐरले सुदूरपश्चिमाञ्चल प्रदेशमा सशस्त्र प्रहरीका १२ जना गोताखोर कार्यरत रहेको जानकारी दिनुभयो । उहाँका अनुसार गोताखोरसहित विपत् व्यवस्थापनसम्बन्धी तालिम लिएर २७२ जनाले यस प्रदेशमा काम गरिरहेका छन् । यस वर्ष असारदेखि भदौ १३ गतेसम्म डुबानमा परेका, खोलाले बगाएका, पहिरोमा प्रभावितलगायत गरी ५१ जनालाई सशस्त्र प्रहरीले उद्धार गरेको जनाइएको छ ।
