पाथीभरा केबलकार विवाद : वार्तामार्फत समाधान खोज्न जसपा नेपालको आग्रह

काठमाडौँ, २१ माघ :  जनता समाजवादी पार्टी, नेपालको केन्द्रीय कार्यकारिणी समितिको बैठक आज सम्पन्न भएको छ । तीन दिनदेखि पार्टी केन्द्रीय कार्यालय बालकुमारीमा जारी बैठक सोमबार साँझ सकिएको छ ।

पूर्वी नेपालमा अहिले भइरहेको ‘नो केबलकार आन्दोलन’ माथिको सरकारी दमन र धरपकड तत्काल बन्द गरी वार्तामार्फत समाधान खोज्न आग्रह गर्दै जसपा नेपालले घाइतेको उपचार र गिरफ्तार गरिएका आन्दोलनकारीलाई अबिलम्ब रिहाइ गर्न सरकारसँग माग गरेको छ ।

किराँत–लिम्बुवानका साँस्कृतिक एवं धार्मिक आस्थाको केन्द्र पाथीभरा (मुकुम्लुङ) को प्राकृतिक संरचनालाई यथावत राख्न भइरहेको आन्दोलनमाथिको सरकारी दमन लोकतान्त्रिक मूल्य मान्यताविरुद्ध रहेको ठहर गर्दै बैठकले यसप्रकार सरकारको अलोकतान्त्रिक कदमको निन्दा गरेको छ ।

धार्मिक साँस्कृतिक आस्था र पहिचानका लागि अहिंसात्मक तथा शान्तिपूर्ण संघर्ष गरिरहेका जनतामाथि सरकारले बल प्रयोग गरेर त्यहाँका आदिवासी–जनजाति समुदायको अधिकारको हनन गरेको जसपाको ठहर छ।