काठमाडौँ, ९ माघः धनगढी वाइल्डक्याट्सले पोखरा लेकर्सलाई पाँच अङ्कले पराजित गर्दै नेपाल कबड्डी लिग (एनकेएल) मा पहिलो जित हात पारेको छ ।
त्रिपुरेश्वस्थित राष्ट्रिय खेलकुद परिषद् (राखेप) कभर्डहलमा आज सम्पन्न खेलमा धनगढी ३८–३३ ले विजयी भएको हो । धनगढीले जित हात पार्ने क्रममा रेडबाट १७, ट्याकलबाट १४, दुई अलआउटबाट चार र बोनसबाट ३ अङ्क जोड्यो ।
पोखराले भने रेडबाट १५, ट्याकलबाट ११, एक अलआउटबाट दुई र बोनसबाट पाँच अङ्क मात्रै बटुल्न सक्यो । योसँगै धनगढी स्पष्ट पाँच अङ्क थप्दै चौथो स्थानमा उक्लिएको छ । धनगढीले तीन खेलबाट कूल ६ अङ्क पु¥याएको छ । समान खेल खेलेको पोखरा तीन अङ्कसहित अङ्क तालिकाको पुछारमा छ । ६ टोली सहभागी प्रतियोगितामा जितविहीन रहने टोली पोखरा मात्रै हो ।
पहिलो हाफमै धनगढीले २३–१२ को फराकिलो अग्रता लिएको थियो । हरेक क्षेत्रमा धनगढी अब्बल रह्यो । रेडबाट १३, ट्याकलबाट ६ र अलआउटबाट चार अङ्क जोडेको थियो । धनगढीले पहिलो हाफमा पोखरालाई दुईपल्ट अलआउट गरेको हो । पोखरा भने यो हाफमा निरिह बन्यो ।
उसले रेडबाट पाँच, ट्याकलबाट चार र बोनसबाट तीन अङ्क जोड्यो । दोस्रो हाफमा एकपल्ट अलआउट गर्दै पोखराले खेलमा पुनरागमन गर्ने सङ्केत देखाएको थियो । यसपल्ट भने पोखराको रेड पनि अब्बल देखिएको थियो । पोखराले रेडबाट १०, ट्याकलबाट सात, अलआउटबाट दुई र बोनसबाट दुई अङ्क बटुलेको थियो ।
धनगढीले भने रेडबाट दुई, ट्याकलबाट आठ र बोनसबाट पाँच अङ्क बटुल्यो । यो हाफमा धनगढीले १५ र पोखराले २१ अङ्क बटुलेको थियो । तर, पहिलो हाफमा लिएको फराकिलो अग्रताले धनगढीलाई पहिलो जित दिलायो ।
