काठमाडौँ, २६ पुस : फोटो तथा चित्रको अनाधिकृत रुपमा प्रयोगका विषयलाई लिएर फोटो पत्रकार तथा कलाकारहरुले नेपाल प्रतिलिपि अधिकार रजिस्ट्रारको कार्यालयले ध्यान दिनुपर्ने बताएका छन् ।
राष्ट्रिय फोटो पत्रकार समूह नेपाल र नेपाल ललितकला प्रज्ञा प्रतिष्ठानको संयुक्त आयोजनामा आज यहाँ आयोजित कला र फोटोग्राफीमा प्रतिलिपि अधिकार विषयक अन्तरक्रिया गरेको थियो ।
राष्ट्रिय फोटो पत्रकार समूहका अध्यक्ष प्रदीपराज वन्तले डिजिटल मिडियाको प्रवेशसँगै फोटो चोरी र कपी हुने प्रवृत्ति बढ्दै गएकाले प्रतिलिपि अधिकारमा समस्या देखिँदै गएको बताउनुभयो ।
नेपाल ललितकला प्रज्ञा प्रतिष्ठानका उपकुलपति लालकाजी लामाले नेपाल प्रतिलिपि अधिकार रजिस्ट्रारको कार्यालयमा प्रतिलिपि अधिकारका विषयमा ध्यान दिन एकमुष्ट सुझाव पेस गर्ने बताउनुभयो ।
नेपाल पत्रकार महासङ्घ, एशोसिएट प्रदेश अध्यक्ष रोयल आचार्यले पत्रकार महासङ्घको तर्फबाट सक्दो सहयोग गर्ने बताउनुभयो । प्रज्ञा प्रतिष्ठानका सदस्य सचिव देवेन्द्रकुमार काफ्लेले तत्काल सबै फोटोग्राफीमा संलग्न सङ्घसंस्थासँग छलफल गरी कानुन निर्माण प्रक्रियालाई सहयोग गर्न एकजुट हुनुपर्ने बताउनुभयो ।
नेपाल प्रतिलिपि अधिकार रजिस्ट्रारको कार्यालयका प्रतिनिधि सालिकराम खतिवडाले हालसम्म गीत सङ्गितका विषयहरु मात्र बढी प्रतिलिपिको बारेमा बहस भएकाले फोटोको विषय झनै जटिल भएकाले आगामी दिनमा विभिन्न फोटो र फोटोकलासँग सम्बन्धित सङ्घसस्थाहरुसँग छलफल र परामर्श गरी क्षतिपूर्तिसहितको कानुन निमार्णमा अगाडि बढ्ने बताउनुभयो ।
उक्त अन्तरक्रिया नेपाल ललितकला प्रज्ञा प्रतिष्ठानका बहुआयामिक तथा सिर्जनात्मक कला विभाग प्रमुख सौरगङ्गा दर्शनधारीको अध्यक्षतामा सम्पन्न भएको हो । कार्यक्रममा फोटो पत्रकार, चित्रकार, प्रतिलिपि रजिस्ट्रारका प्रतिनिधि र नेपाल ललितकला प्रज्ञा प्रतिष्ठानका परिषद् सदस्यहरूको उपस्थिति रहेको थियो ।
