काठमाडौँ, १३ पुसः बलिउड अभिनेता सलमान खानको प्रतिक्षित फिल्म ‘सिकन्दर’ को टिजर सार्वजनिक भएको छ । १ मिनेट ४१ सेकेन्डको टिजरमा उनको दमदार एक्सन देख्न सकिन्छ । टिजरको ब्याकग्राउन्ड म्युजिक उत्कृष्ट छ ।
निर्देशक एआर मुरुगादासले इन्स्टाग्राममार्फत टिजर सार्वजनिक गरेका हुन् । नाडियाडवाला ग्राण्डसनको युट्युब च्यानलबाट टिजर रिलिज भएको हो । टिजरमा सिकन्दरको भूमिकामा देखिएका सलमान एकैसाथ मास्क लगाएर धेरै मानिससँग सामना गरिरहेको देखिन्छ ।
टिजरमा उनको संवाद छ, ‘धेरै मान्छे मेरो पछि लागेका छन् भन्ने सुनेको छु, मलाई फर्किन ढिलो भयो ।’ यो संवाद र उत्कृष्ट ब्याकग्राउण्ड साउण्डसँग सलमानले बन्दुकको लडाइ लडेको देख्न सकिन्छ ।
सलमानसहित रश्मिका मन्दाना स्टारर फिल्म सन् २०२५ को इदको अवसरमा रिलिज हुँदैछ । निर्देशक मुरुगादासले यसअघि गजनी, हलिडे र अकिरा जस्ता हिन्दी फिल्म निर्देशन गरिसकेका छन् । फिल्मलाई साजिद नाडियाडवालाले निर्माण गरेका हुन् । फिल्मको स्ट्रिमिङ पार्टनर नेटफ्लिक्स हो ।
