काठमाडौँ, ८ पुस : अमेरिकी निर्वाचित राष्ट्रपति डोनाल्ड ट्रम्पले संयुक्त राज्य अमेरिकाले प्रमुख खनिज र तेल भण्डार भएको रणनीतिक टापुको नियन्त्रण लिन चाहेको सङ्केत गर्नुभएपछि ग्रिनल्यान्डले सोमबार यो बिक्रीका लागि नभएको कुरामा जोड दिएको छ ।
ट्रम्पले आफ्नो पहिलो कार्यकालमा यो विशाल डेनिश क्षेत्र किन्ने प्रस्ताव गर्नुभएको थियो । जसलाई तत्काल अस्वीकार गरिएको थियो । उहाँले आफ्नो आगामी प्रशासनका लागि कोपेनहेगनमा राजदूत नियुक्त गर्दा यो प्रयासलाई पुनर्जीवित गर्नुभयो ।
ग्रिनल्यान्डका प्रधानमन्त्री म्युट इगेडले सम्झौताको कुनै पनि सम्भावनालाई तुरुन्तै खारेज गर्नुभयो । “ग्रिनल्यान्ड हाम्रो हो । हामी बिक्रीका लागि होइनौँ र कहिले पनि बिक्रीका लागि हुनेछैन । हामीले स्वतन्त्रताका लागि हाम्रो लामो सङ्घर्ष गुमाउनु हुँदैन”, उहाँले एक विज्ञप्तिमा भन्नुभयो ।
विश्वको सबैभन्दा ठूलो टापु ग्रिनल्यान्ड एउटा स्वायत्त डेनिस क्षेत्र हो । यसको आफ्नै संसद्, करिब ५५ हजार बासिन्दा र एउटा सानो स्वतन्त्रता समर्थक आन्दोलन छ । यसले आफ्नो सार्वजनिक बजेटको आधाभन्दा बढी डेनमार्कबाट प्राप्त गर्छ ।
“विश्वभरको राष्ट्रिय सुरक्षा र स्वतन्त्रताको उद्देश्यका लागि संयुक्त राज्य अमेरिकाले ग्रिनल्यान्डको स्वामित्व र नियन्त्रण एक पूर्ण आवश्यकता हो भन्ने महसुस गर्दछ”, ट्रम्पले आइतबार पोस्ट गर्नुभयो ।
देशले ग्रिनल्यान्ड बिक्रीका लागि नभएको बताएपछि राष्ट्रपतिका रूपमा उहाँले सन् २०१९ मा डेनमार्कको राजकीय भ्रमण रद्द गर्नुभएको थियो ।
राष्ट्रपति जो बाइडेनको कार्यकालमा संयुक्त राज्य अमेरिकाले आफूले खरिद गर्न नचाहेको तर यसको सट्टा सम्बन्ध बलियो बनाउन खोजेको बताएको थियो ।
