कथाकार सुलोचनाको ‘एकजोर आँखा’ सार्वजनिक

काठमाडौँ, पुस १३ गते । कथाकार सुलोचनाको ‘एक जोर आँखा’ सार्वजनिक भएको छ । पछिल्लो समय सामाजिक सञ्जालमा पारिवारिक र प्रेम सम्बन्धका रिल र टिकटक बनाएर चर्चामा रहनुभएकी सुलोचनाको कथासङ्ग्रह आइतबार सार्वजनिक भएको हो ।

शिल्पी थिएटरमा आयोजित पुस्तक विमोचन कार्यक्रममा कथाकार भागिरथी श्रेष्ठ, कथाकार सुलोचनासँगै उहाँका दिदी पद्मा र सुर्दशनाले एकसाथ पुस्तक सार्वजनिक गर्नुभएको हो । कथाकार सुलोचनाले आफ्नो पुस्तक ‘एक जोर आँखा’ भूइँ मान्छेले देखेको तर अझै साकार हुन बाँकी रहेको मीठो सपना भएको बताउनुभयो ।  पुस्तक विमोचनपछि कथाकार सुलोचनासँग कवि उज्ज्वला महर्जनले संवाद गर्नुभयो । १६ वटा कथा समेटिएको ‘एकजोर आँखा’ पुस्तक न्युरोड बुक स्टोर, काठमाडौँले प्रकाशनमा ल्याएको हो ।

कार्यक्रममा कथाकार भागिरथी श्रेष्ठले सुलोचनाको कृतित्व र व्यक्तित्वमाथि प्रकाश पार्नुभयो । कविता, कथा, नियात्रा, निबन्ध र गीतमा समेत सुलोचनाको कलम चलेको भन्दै श्रेष्ठले सुलोचनाको लेखन शैलीको प्रशंसा गर्नुभयो । उहाँले सुलोचना साहित्यकार मात्र नभएर कुशल गृहिणी, राजनीतिकर्मी, समाजसेवी भएको बताउनुभयो । श्रेष्ठले कथाकार सुलाेचनाको पारिवारिक सम्बन्ध र भात भान्साको कुरासमेत सार्वजनिक भयो ।

कार्यक्रमलाई सम्बोधन गर्दै सुलोचनाकी छोरी आभाले आमाको प्रेरणाबाट आफूले पनि लेख्ने गरेको बताउनुभयो । पुस्तक विमोचन समारोहमा कवि शार्दुल भट्टराई, अविनाश श्रेष्ठ, सुदर्शन श्रेष्ठ, वसन्त श्रेष्ठ, उज्ज्वला महर्जन, घिमिरे युवराज तथा पुस्तक प्रकाशक राजेश गजुरेललाई दोसल्ला ओढाएर सम्मान गरिएको थियो।