मान्छे कर्मले सधैँ अमर रहन्छ : सञ्चारमन्त्री खरेल

काठमाडाैं, पुस ९ गते । समाजसेवी स्वर्गीय ओमप्रकाश गोयलको हुलाक टिकट सार्वजनिक गरिएको छ । हुलाक सेवा विभागद्वारा आयोजित एक कार्यक्रमबीच गोयलको हुलाक टिकटको प्रथम दिवसीय आवरणमा टाँचा प्रदान गरेर सरकारले गोयलको नाममा हुलाक टिकट सार्वजनिक गरेको हो ।

टाँचा प्रदान कार्यक्रममा उपसभामुख इन्दिरा राना  र सञ्चार तथा सूचना प्रविधिमन्त्री जगदीश खरेलले स्व. गोयलको हुलाक टिकटको प्रथम दिवसीय आवरणमा टाँचा प्रदान गर्नुभयो । कार्यक्रममा सम्बोधन गर्दै मन्त्री खरेलले गोयलको हुलाक टिकटको प्रथम दिवसीय आवरणमा टाँचा प्रदान गर्नु ऐतिहासिक भएको बताउनुभयो । यसले उहाँलाई सधैँ अमर बनाइरहने बताउनुभयो । उहाँले मानिस कर्मले सधैँ अमर रहने उल्लेख गर्नुभयाे ।

उहाँले भन्नुभयो, ‘मान्छे कर्मले सधैँ अमर रहन्छ । आज ओमप्रकाश गोयल अमर हुनुभयो हाम्रो यो हुलाक टिकटमार्फत । हुलाक टिकट ऐतिहासिक छ । यसले नेपाल र नेपालीमाझ यसले सधैँ अमर बनाइरहने नै छ ।’

यस्तै, ओमप्रकाश गोयलको सम्मान देशले नै गर्नुपर्ने उहाँकाे भनाइ छ ।