काठमाडौँ, ३२ असार: नेपाली कांग्रेसका नेता डा शेखर कोइरालाले जलवायु न्यायको विषय आफूले संसद्लगायत विभिन्न मञ्चमा उठाउने प्रतिबद्धता व्यक्त गर्नुभएको छ ।
मानवअधिकार तथा शान्ति समाजको केन्द्रीय कार्यालयमा आयोजित छलफल कार्यक्रममा उहाँले जलवायु परिवर्तनको प्रभाव सबै क्षेत्रमा पर्ने भएकाले यो मुद्दा सबै मञ्चमा उठाएर जागरण फैल्याउनुपर्नेमा जोड दिनुभयो ।
जलवायु परिवर्तन हालको मुख्य मुद्दा भएकाले यसमा सरोकार भएका सबै निकायले काम गर्नुपर्ने नेता कोइरालाको भनाइ थियो । संविधान संसोधनका सन्दर्भमा शान्ति समाजले अघि सारेको एजेण्डा महत्त्वपूर्ण भएको पनि उहाँले बताउनुभयो ।
समाजका सभापति रेनुका पौडेलले संस्थाको गतिविधिकाबारे जानकारी दिनुभएको थियो ।
कार्यक्रममा केन्द्रीय सदस्य रोजिना विष्टले जलवायु न्यायसम्बन्धी शान्ति समाजको १० बुँदे धारणा प्रस्तुत गर्नुभएको थियो । समाजले संविधान संशोधनका गर्दा समेट्नुपर्ने विषयबारे अभियान सञ्चालन गर्दै आएको छ । यसैगरी विगत दुर्ई दशकदेखि प्राकृतिक विपत्तिका दौरान उद्धार, राहत र पुनर्वासका लागि बलियो स्थायी संयन्त्र बनाउनुपर्नेमा जोड दिँदै आइएको समाजका कोषाध्यक्ष चन्द्रमणि बञ्जाराले बताउनुभयो ।
कार्यक्रमा समाजका संस्थापक सभापति कृष्ण पहाडी, पूर्वसभापतिहरू, केन्द्रीय कार्यसमितिका पदाधिकारी तथा सदस्यहरू र विभिन्न शाखा सदस्यहरूको सहभागिता रहेको थियो ।
