जेष्ठ ६, काठमाडौं : काठमाडौं महानगरपालिकाले जेठ ७ गतेदेखि सुरु गर्ने सीप मेलामा ३५ सय जनाभन्दा बढीको आवेदन परेको छ । ३० दिनसम्म सञ्चालन हुने विभिन्न १० क्षेत्रका ४२ पेशासँग सम्बन्धित तालिमका लागि आइतबारसम्म ३५ सय ७६ जनाको अनलाइन आवेदन परेको महानगरले जानकारी दिएको छ ।
महानगरले सीप मेलाका लागि ८ वटा पेशासँग सम्बन्धित तालिम थप गरेको छ । यसअघि आइसीटी क्षेत्रमा छानिएका ५ वटा पेशामा थप गरेर १२ वटा बनाइएको छ । थपिएका पेशामा साइबर सेक्युरिटी, मल्टिमिडिया, डट नेट, जाभा, पीएचपी र ग्राफिक्स डिजाइन रहेका छन् ।
यस क्षेत्रमा डिजिटल मार्केटिङ्, ड्रोन, रोवोटिक्स, फाइबर अब्टिक्स टेक्निसियन, बौद्धिक कृतिमता (एआइ) र यसको प्रयोग (एआइ एण्ड इट्स एप्लिकेसन) गरी ५ विधाका तालिम गर्ने तयारी थियो । यस्तै व्युटिसियन (सौन्दर्य) क्षेत्रमा विक्स (नक्कली कपाल बनाउने) पेशा थप भएको छ । यसमा सौन्दर्यकर्मी, मेकअप एण्ड हेयर, नेल टेक्निसियन, कपाल काट्ने (वार्वर) गरी ४ पेशा राखिएका थिए ।
यसअघि तयारी गरिएका १० क्षेत्रका ३४ पेशासँग सम्बन्धित तालिममा क्षेत्र थपिएका छैनन् । पेशातर्फ ८ वटा थपिएपछि अब तालिम सञ्चालन हुने पेशाको संख्या ४२ पुगेको छ । रोजगारदाताको माग आएपछि कक्षा थपिएको कार्यान्वयन समितिका संयोजक इञ्जिनियर शैलेन्द्र झाले जानकारी दिए ।
महानगरले सरकारी निकाय, गैरसरकारी संघसंस्था, निजी क्षेत्र तथा दातृ निकायसँग सहकार्य गरेर निःशुल्क तालिम सञ्चालन गर्न लागेको हो । यस वर्ष २०८२ जनालाई निःशुल्क तालिम दिने लक्ष्य राखिएको महानगरले जानकारी दिएको छ । १८ वर्षदेखि ५८ वर्ष उमेर समूहका नेपाली नागरिकलाई तालिममा सहभागी गराइनेछ । दैनिक ६ वटा कक्षा सञ्चालन गरेर १ सय घण्टा तालिम दिइनेछ ।
