रवि लामिछाने छुट पुर्जी लिन भैरहवा जाँदै

काठमाडौं, पुस  ४ गते  । राष्ट्रिय स्वतन्त्र पार्टी (रास्वपा)का सभापति तथा पूर्वगृहमन्त्री रवि लामिछाने रिहाइ प्रक्रियाका लागि रुपन्देही जाँदैछन्।

नख्खु कारागार प्रशासनले उनलाई आज बिहान त्रिभुवन अन्तर्राष्ट्रिय विमानस्थल पुर्‍याएको छ। उनी जहाजमार्फत भैरहवा जाने तयारीमा छन्।

रिहाइ प्रक्रिया पूरा गर्न उनी जिल्ला अदालत रुपन्देही पुगेर छुटपुर्जी कागजात लिनुपर्नेछ। यसअघि उच्च अदालत तुल्सीपुरको बुटवल इजलासले रवि लामिछानेबाट पेश भएको २ करोड ७४ लाख ८४ हजार रुपैयाँ बराबरको बैंक ग्यारेन्टी स्वीकार गर्दै थुनामुक्त गर्न आदेश दिएको थियो।

बिहान ७ः५५ बजेका लागि तय गरिएको उडान भैरहवा क्षेत्रमा बाक्लो हुस्सु लागेका कारण ढिलाइ भएको बताइएको छ।

भैरहवा विमानस्थल पुगेपछि सिधै अदालत जाने तयारी छ।

यसैबीच, रास्वपाका कार्यकर्ताहरू भैरहवा विमानस्थल वरिपरि भेला भइसकेका छन्।